សៀមរាប: យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា ជនជាតិចិនម្នាក់បានស្លាប់ នៅក្នុងមន្ទីរពេទ្យអន្តរជាតិរ៉ូយ៉ាល់អង្គរ ស្ថិតនៅភូមិកសិកម្ម សង្កាត់ស្រង៉ែក្រុង/ខេត្តសៀមរាប កាលពីវេលាម៉ោងប្រហែល១២និង៥នាទី ថ្ងៃទី២៦ ខែធ្នូ ឆ្នាំ២០១៨។
សមត្ថកិច្ចនគរបាលបានឲ្យដឹងថា ជនរងគ្រោះឈ្មោះ BAI CHANGJUN ភេទប្រុស អាយុ៥១ឆ្នាំ ជនជាតិចិន។ ចូលមកព្រះរាជាណាចក្រកម្ពុជាកាលពីថ្ងៃទី២២ ខែធ្នូ ឆ្នាំ២០១៨ តាមច្រកព្រលានយន្តហោះអន្តរជាតិភ្នំពេញ នឹងបានបន្តដំណើរមកកាន់ខេត្តសៀមរាប កាលពីថ្ងៃទី២៥ ខែ ធ្នូ ឆ្នាំ២០១៨ ស្នាក់នៅបន្ទប់លេខ២០៣ សណ្ឋាគារ គ្រីស្តាល់ ភូមិគ្រួស សង្កាត់ស្វាយដង្គំ ក្រុងខេត្តសៀមរាប។
តាមការសាកសួរមិត្តភ័ក្ត្របានឲ្យដឹងថានាវេលាម៉ោងប្រហែល១០និង៤០នាទីព្រឹកថ្ងៃទី២៦ ខែធ្នូ ឆ្នាំ២០១៨ ក្នុងពេលកំពុងទស្សនាប្រាសាទបាយ័ន ជនរងគ្រោះក៏ស្រាប់តែមានអការ:មិនស្រួលខ្លួន ហើយត្រូវបានបញ្ជូនមកសង្គ្រោះនៅមន្ទីរពេទ្យអន្តរជាតិរ៉ូយ៉ាល់អង្គរ រហូតដល់វេលាម៉ោងប្រហែល១២និង០៥នាទី ជនរងគ្រោះក៏បានស្លាប់។
ផ្អែកតាមការស្រាវជ្រាវរបស់សមត្ថកិច្ចជំនាញនៅលើខ្លួនសាកសពពុំមានអ្វីគួរឲ្យកត់សម្គាល់ឡើយ និងតាមការពិនិត្យរបស់លោកវេជ្ជបណ្ឌិត អ៊ិត ឆបឆរ័ត្ន គ្រូពេទ្យអមតុលាការខេត្ត បានសន្និដ្ឋានថា៖ ជនរងគ្រោះស្លាប់ដោយគាំងបេះដូង។
សាកសពត្រូវបានបញ្ជូនទៅតម្កល់ទុកបណ្តោះអាសន្ននៅមន្ទីរពេទ្យមិត្តភាពខ្មែរសូវៀត(ពេទ្យរុស្ស៊ី) តាមសំណូមពររបស់មិត្តភ័ក្ត្រ និងតំណាងស្ថានកុងស៊ុល ៕
មតិយោបល់