ភ្នំពេញៈ នៅព្រឹកថ្ងៃទី៥ ខែមករា ឆ្នាំ២០១៩ នាយកដ្ឋានស៊ើបអង្កេត និងអនុវត្តនីតិវធី នៃអគ្គនាយកដ្ឋានអន្តោប្រវេសន៍ បានធ្វើការបណ្ដេញជនបរទេសចំនួន១០នាក់(ប្រុស) មាន៤សញ្ជាតិ ចេញពីព្រះរាជាណាចក្រកម្ពុជា ទៅប្រទេសកំណើតវិញតាមប្រកាសរបស់ក្រសួងមហាផ្ទៃ។

ក្នុងចំណោមជនបរទេស១០នាក់ខាងលើរួមមាន៖ ជនជាតិអាមេរិក២នាក់ រុស្សីម្នាក់ ទួកគីម្នាក់ ពាក់ព័ន្ធករណីលួចស្នាក់នៅក្នុងព្រះរាជាណាចក្រកម្ពុជាដោយខុសច្បាប់ (គ្មានលិខិតឆ្លងដែន និងហួសទិដ្ឋាការកំណត់)។ ចំណែកជនជាតិចិនចំនួន ៦នាក់ទៀត ត្រូវបានសមត្ថកិច្ចនគរបាល នាយកដ្ឋានស៊ើបអង្កេត និងអនុវត្តនីតិវធី នៃអគ្គនាយកដ្ឋានអន្តោប្រវេសន៍ ឃាត់ខ្លួនកាលថ្ងៃទី២៥ ខែធ្នូ ឆ្នាំ២០១៨ ស្ថិតក្នុងទីតាំងផ្ទះលេខ២៣២ ផ្លូវប៉ូឡារីស (បូរីប៉េងហួត) សង្កាត់និរោធ ខណ្ឌច្បារអំពៅ រាជធានីភ្នំពេញ ពាក់ព័ន្ធបទល្មើស កេងចំណេញផ្លូវភេទ ពីស្ត្រីវ័យក្មេង និងអនីតិជន ដោយប្រើប្រាស់កម្មវិធីថ្មីឈ្មោះ (APP Program) ដើម្បីអូសទាញជនរងគ្រោះនៅប្រទេសចិន រួចជនសង្ស័យទាំងនោះបានរត់គេចចូលមកលាក់ខ្លួននៅប្រទេសកម្ពុជា។

ការបណ្ដេញនេះក៏មានការចូលរួមសហការជាមួយសមត្ថកិច្ចប្រទេសចិនមកទទួលយកផងដែរ៕