ភ្នំពេញៈ ភ្នាក់ងារ Post News បានរាយការណ៍មកថា នៅម៉ោង២រសៀល ថ្ងៃទី៦ ខែកក្កដា ឆ្នាំ២០១៦នេះ មានការភ្ញាក់ផ្អើលមួយបានកើតឡើងនៅតាមបណ្តោយផ្លូវ១១១ កែងនិងផ្លូវ២៤២ សង្កាត់បឹងប្រលិត ខណ្ឌ៧មករា ក្រោយពីគេដឹងថា មានមនុស្សម្នាក់បានស្លាប់ និង២នាក់ផ្សេងទៀតរងរបួសបន្ទាប់ពី បាក់អាងស្តុកទឹកនៅក្នុងការដ្ឋានសំណង់ដ៏ធំមួយ ស្ថិតនៅអគារជាន់ទី២ ដែលមានរយៈពេលជាង៣ម៉ោង។
បើតាមសមត្ថកិច្ចបានឲ្យដឹងថា ជនរងគ្រោះដែលបាត់បង់ជីវិតឈ្មោះ ឆាយ ឆាន ភេទប្រុស អាយុ៥០ឆ្នាំ ជាកម្មករសំណង់នៅទីនោះ មានស្រុកកំណើតនៅភូមិពោ ឃុំប្រធាតុ ស្រុកកំពង់ត្របែក ខេត្តព្រៃវែង។ ដោយឡែក កម្មករដែលរងរបួសពីរនាក់ទៀត ត្រូវបានគេស្គាល់ឈ្មោះម្នាក់ សំរិត សាម៉ន និងម្នាក់ទៀត មិនទាន់ស្គាល់អត្តសញ្ញាណនៅឡើយទេពេលនេះ ដោយស្ថិតក្នុងការសង្គ្រោះនៅក្នុងមន្ទីរពេទ្យកាល់ម៉ែត។
បើតាមប្រភពពីកម្មករដែលធ្វើការនៅទីនោះបានប្រាប់ថា មុនពេលកើតហេតុ កម្មករចំនួន៥នាក់បានចុះទៅក្នុងអាងស្តុបទឹកដែលកំពុងសាងសង់ បណ្តាលឲ្យបាក់ស្រុតលើកម្មករម្នាក់ស្លាប់ភ្លាមៗ ពីរទៀតរងរបួសធ្ងន់ និងពីរទៀតគ្រាន់តែរងរបួសស្រាលតែប៉ុណ្ណោះ។
ក្នុងហេតុការណ៍នោះ មេកាសំណង់បានព្យាយាមលាក់បាំងមិនឲ្យព័ត៌មានខាងលើនេះ ធ្លាយចេញមកក្រៅ ហើយបានលួចដឹកសាកសពចេញពីការដ្ឋានភ្លាមៗ និងយកអ្នករងរបួសទៅសង្គ្រោះនៅមន្ទីរពេទ្យ ដោយមិនប្រាប់ដល់អាជ្ញាធរមូលដ្ឋានឡើយ ពោលគឺគេបានព្យាយាមលាក់បាំងរឿងនេះ រយៈពេលជិត៤ម៉ោងដោយសមត្ថកិច្ចទទួលបានព័ត៌មានពីខាងមន្ទីរពេទ្យមកវិញ ទើបធ្វើការស្រាវជ្រាវដឹងពីទីតាំងខាងលើ ហើយសមត្ថកិច្ចបានចុះមកត្រួតពិនិត្យ ហើយបាននាំខ្លួនមេកាសំណង់យកទៅសួរនាំនៅប៉ុស្តិ៍នគរបាលបឹងប្រលិត។
ក្នុងករណីនេះ គេមិនទាន់ដឹងថា សមត្ថកិច្ចមានចំណាត់ការយ៉ាងណាទៅលើមេកាសំណង់ និងទីតាំងខាងលើនោះនៅឡើយទេ។
ព័ត៌មានលម្អិត Post News នឹងផ្សាយនៅពេលបន្តិចទៀតនេះ៕
មតិយោបល់