ពោធិ៍សាត់: កាលពីម៉ោង១១ និង២០នាទីថ្ងៃទី១២ ខែមករា ឆ្នាំ២០១៩ មានករណីប្រទះឃើញសពបុរសម្នាក់ ដេកស្លាប់នៅលើកាណូតស្មាច់មួយគ្រឿង ដែលរសាត់តាមទឹកពីក្បាលតោលមកទើរនៅចំណុចព្រែកកន្លុកតាថាក់ ស្ថិតក្នុងភូមិព្រែកក្រ ឃុំមេទឹក ស្រុកបាកាង ខេត្តពោធិ៍សាត់។
ជនរងគ្រោះឈ្មោះ អួក សាន អាយុ៥២ឆ្នាំ ភេទប្រុស រស់នៅភូមិក្បាលតោល ឃុំកោះជីវាំង ស្រុកឯកភ្នំ ខេត្តបាត់ដំបង មានស្រុកកំណើតនៅភូមិទី៤ សង្កាត់ចុងឃ្នាស ក្រុងសៀមរាប ខេត្តសៀមរាប ចំណែកប្រពន្ធឈ្មោះ ឡុង រ៉េត។
សមត្ថកិច្ច បានឲ្យដឹងថា នៅវេលាថ្ងៃកើតហេតុ មានពលរដ្ឋនៅភូមិក្បាលតោលប្រទះឃើញ មនុស្សដេកស្លាប់នៅលើកាណូតស្មាច់ នៅចំណុចកើតហេតុ។
ក្រោយទទួលបានដំណឹងនេះភ្លាម កម្លាំងអធិការដ្ឋានស្រុកបាកាន បានសហការ ជាមួយលោកនាយប៉ុស្តិ៍កោះជីវាំង ស្រុកឯកភ្នំ ខេត្តបាត់ដំបង ចុះទៅត្រួតពិនិត្យនៅកន្លែងកើតហេតុ ។
តាមសន្និដ្ឋានបឋម បានឲ្យដឹងថា ករណីខាងលើសង្ស័យជាករណីឃាតកម្ម គ្រោងទុកជាមុន ដែលកើតឡើងនៅក្បាលតោល រួចដាក់សពជនរងគ្រោះលើកាណូតស្មាច់ រសាត់តាមទឹកមកទើរចំណុចកើតហេតុខាងលើ។
បញ្ជាក់៖ ក្រោយពិនិត្យរួច សពត្រូវបានសមត្ថកិច្ចប្រគល់ឲ្យប្រពន្ធជនរងគ្រោះ យកទៅធ្វើបុណ្យតាមប្រពៃណី៕
មតិយោបល់