បាត់ដំបងៈ យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា សមត្ថកិច្ចឃាត់ខ្លួនបុរសម្នាក់ ឈ្លោះប្រកែកគ្នា យកដុំថ្មគប់បណ្តាលឲ្យស្លាប់ម្នាក់ ស្ថិតនៅភូមិភ្នំចាំចាប ឃុំបឹងរាំង ស្រុកកំរៀង ។
ហេតុការណ៍នេះបានកើតឡើង កាលពីថ្ងៃទី១៣ ខែមករា ឆ្នាំ២០១៩ វេលាម៉ោង ១៤៖១០នាទី ។
យោងតាមរបាយការណ៍ពី លោកវរសេនីយ៍ឯក គឹម.ពន្លក អធិការនគរបាលស្រុកកំរៀង បានរាយការណ៍អោយដឹងថា មានករណីហិង្សាដោយចេតនាមានស្ថានទំងន់ទោស បង្កដោយជនសង្ស័យឈ្មោះ អ៊ុន.អឿម ភេទប្រុស អាយុ ៣៨ឆ្នាំ រស់នៅភូមិភ្នំចាំចាប ឃុំបឹងរាំង ស្រុកកំរៀង បានប្រើប្រាស់ដុំថ្មគប់ និងបានវាយទាត់ធាក់ទៅលើជនរងគ្រោះឈ្មោះ ហុន.ហូយ ភេទប្រុស អាយុ ៣៨ឆ្នាំ រស់នៅភូមិឃុំជាមួយគ្នា បណ្តាលអោយរងរបួសធ្ងន់ និងស្លាប់បាត់បង់ជីវិតពេលបញ្ជូនទៅមន្ទីរពេទ្យ។
សមត្ថកិច្ចបានបញ្ជាក់អោយដឹងថា ជនរងគ្រោះនិងជនជនសង្ស័យមានទំនាស់ឈ្លោះប្រកែកគ្នាទើបកើតជាហិង្សារហូតជនសង្ស័យយកដុំថ្មគប់ទៅលើជនរងគ្រោះបណ្តាលអោយស្លាប់។
បច្ចុប្បន្ន ជនសង្ស័យត្រូវបានសមត្ថកិច្ចឃាត់ខ្លួន និងកំពុងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការបន្តតាមនីតិវិធីច្បាប់៕
មតិយោបល់