Post News Media ព័ត៌មានជាតិ ចុម! មន្ត្រីយ...

ចុម! មន្ត្រីយោធាបើករថយន្តស្លាកលេខ ខ.ម ០៨៤៧ មិនគោរពភ្លើងសញ្ញាចរាចរណ៍ពណ៌ក្រហម បុករះម៉ូតូនិងរថយន្ត របួសធ្ងន់ម្នាក់

បន្ទាយមានជ័យ: មានករណីគ្រោះថ្នាក់ចរាចរណ៍មួយបានកើតឡើង រវាងរថយន្តម៉ាកឌីមិច ពណ៌ត្រេអ៊ី ពាក់ស្លាកលេខ ខ.ម ០៨៤៧ ​បើកបរមិនគោរពភ្លើងសញ្ញាចរាចរណ៍ពណ៌ក្រហម បានជ្រុលមកបុកនឹងម៉ូតូម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១២ ពាក់ស្លាកលេខ​ បន្ទាយមានជ័យ​ 1G​-8620​ រួចបន្តទៅបុករថយន្ត១គ្រឿងទៀតម៉ាកកាមរី​ ពណ៌សំបកឪឡឹក​ សេរ៊ីឆ្នាំ១៩៩២ ទើបអស់ល្បឿនលឿនទៅមុខលែងរួច និងបណ្តាលឲ្យមនុស្សម្នាក់រងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យ។

ហេតុការណ៍នេះកើតឡើងនៅម៉ោង ១១ព្រឹកថ្ងៃទី១៥ ខែធ្នូ ឆ្នាំ២០១៩ នៅចំណុចភ្លើងស្តុប ស្រុកស្វាយចេក ខេត្តបន្ទាយមានជ័យ។

សូមបញ្ជាក់ថា ករណីនេះកើតឡើងរវាងរថយន្តបុកម៉ូតូ រួចបន្តទៅបុករថយន្តមួយគ្រឿងទៀតក្នុងទិសដៅផ្ទុយគ្នាចំណុចភ្លើងស្តុប លើផ្លូវជាតិលេខ​ ៥៦អា ក្នុងភូមិស្ទឹង ឃុំរលួស ស្រុកស្វាយចេក ខេត្តបន្ទាយមានជ័យ ដោយបង្កឡើងដោយថយន្ត១គ្រឿងម៉ាកឌីមិច ពណ៌ត្រេអ៊ី ពាក់ស្លាកលេខ ខ.ម ០៨៤៧​ បើកបរដោយមន្ត្រីយោធា ម្នាក់ឈ្មោះ ណុំ​ សុគា ភេទប្រុស អាយុ៣២​ឆ្នាំ​ រស់នៅភូមិសែនរុងរឿង១ ឃុំទឹកក្រហម ស្រុកជាំក្សាន្ត ខេត្តព្រះវិហារ បើកបរពីជើងទៅត្បូងមកដល់ចំណុចភ្លើងស្តុបមានភ្លើងក្រហម​ តែមិនឈប់បានបុកម៉ូតូមួយគ្រឿងទៀតម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០១២ ពាក់ស្លាកលេខ​ បន្ទាយមានជ័យ​ 1G​-8620 បើកបរដោយឈ្មោះ​ នូវ ព្រឿន ភេទប្រុស​ អាយុ៥៩ឆ្នាំ​ រស់នៅភូមិពន្សាយជើង ឃុំស្វាយចេក
ស្រុកស្វាយចេក ខេត្តបន្ទាយមានជ័យ​ បើកបរឆ្លងផ្លូវពីលិចទៅកើត​ រួចរថយន្តនោះបន្តទៅបុករថយន្តមួយគ្រឿងទៀតម៉ាក​កាមរី​ ពណ៌សំបកឪឡឹក​ សេរ៊ីឆ្នាំ១៩៩២ (ដែលឈប់ចាំភ្លើងស្តុបពណ៌ក្រហម) បើកបរដោយឈ្នោះ ដន ស ភេទប្រុស​ អាយុ៥៥ឆ្នាំ​ មានទីលំនៅភូមិតាបែន ឃុំតាបែន ស្រុកស្វាយចេក ខេត្តបន្ទាយមានជ័យ។

ក្នុងករណីនេះបណ្ដាលឲ្យឈ្មោះ នូវ ព្រឿន របួសបែកក្បាល(ធ្ងន់)និង​បាក់កជើងឆ្វេង បញ្ជូនទៅសង្គ្រោះនៅមន្ទីរពេទ្យ។

ចំណែកមូលហេតុដោយសារអ្នកបើកបររថយន្តត្រេអ៊ីឈ្មោះ ណុំ សុគា បើកបរមិនគោរពភ្លើងស្តុប(ពណ៌ក្រហម) និងបណ្តាលឲ្យម៉ូតូខូចខាតធ្ងន់ រថយន្តទាំង២ខូចខាតស្រាល យកទៅរក្សាទុកនៅអធិការដ្ឋានស្រុកស្វាយចេក៕

Loading...