Post News Media ព័ត៌មានជាតិ ស្ត្រី​ម្នាក់...

ស្ត្រី​ម្នាក់ស្រែកយំរត់ចេញពីផ្ទះស្រែកឲ្យគេជួយ ដោយសារតែប្តីចិត្តកំណាច​

ភ្នំពេញ:​ ស្ត្រីម្នាក់ ស្រែកយំរត់ចេញពីផ្ទះ​ទាំងមានរបួស​ បន្ទាប់​ពីផឹកស៊ីស្រវឹង​ជាមួយប្តី​រួចបាននិយាយ​ទាស់​សម្តី​គ្នា​បន្តិចបន្តួច​រឿងប្តូរផ្ទះជួល រហូតឈាន​ទៅដល់ការ​ប្រតាយប្រតប់​គ្នា​ បង្ក​ឲ្យមានការ​ភ្ញាក់ផ្អើល​ឡើង​កាលពីវេលា​ម៉ោង​១១និង១០នាទីយប់​ ថ្ងៃទី​១៥​ ខែមករា​ ឆ្នាំ​២០១៩ ​ត្រង់ចំណុច​តាមបណ្ដោយ​ផ្លូវ​២៥៧ ​កែង​និង​ផ្លូវ​២៣០​ ស្ថិតក្នុងសង្កាត់​ទឹកល្អក់​ទី​៣​ ខណ្ឌ​ទួលគោក​។

ស្ត្រី​ជា​ប្រពន្ធ​មានអាយុ៣០ឆ្នាំ​ ជាកម្មការនីរោងចក្រ ។ ចំណែកឯបុរសជាប្តីមានអាយុ៣៧ឆ្នាំ​ ជាអ្នកយាម​ឃ្លាំងម៉ូតូនៅក្បែរកន្លែងកើតហេតុ​។

បើតាម​សម្តី​ពី​ស្ត្រី​ជា​ប្រពន្ធ​ បាន​រៀបរាប់ទាំងទឹក​ភ្នែក​ប្រាប់​ឲ្យ​ដឹងថា​ គាត់​និង​ប្តី​របស់​គាត់​បាន​រួមរស់នៅជាមួយគ្នាអស់រយ:ពេលជាងមួយឆ្នាំមកហើយ​ ប៉ុន្តែ​មិនបាន​រៀបការតាម​ប្រពៃណី​នោះទេ។ លុះនៅមុនពេលកើតហេតុ​គាត់និងប្តីរបស់​គាត់​បានទៅលេងផ្ទះបងស្រីរបស់ប្តីគាត់នៅម្តុំវត្ត​ពោធិ៍​ញៀនដើម្បីសួររកមើលផ្ទះសម្រាប់ស្នាក់២នាក់គាត់។ លុះពេលត្រលប់មកដល់ផ្ទះ​វិញ​ ប្តី​របស់​គាត់​ក៏​បាន​ស្តី​បន្ទោសរឿង​ដែល​ត្រូវដូរផ្ទះជួលពីមួយកន្លែងទៅមួយកន្លែង​ ដោយសារ​តែ​ការ​រករឿងឈ្លោះ​ប្រកែក​គ្នារបស់គាត់​ ធ្វើឲ្យប៉ះ​ពាល់​ដល់អ្នកជិតខាង ទើបបានជាត្រូវដូរផ្ទះជួល។ ពេលនោះគាត់ក៏បាន​និយាយ​តបទៅប្តី​វិញ​ រហូតកើតមានជា​ជម្លោះ​ហើយយប្តីរបស់គាត់ក៏បាន​ប្រើប្រាស់អំពើហិង្សាដាក់មក​លើរូបគាត់​បណ្តាល​ឲ្យគាត់​រងរបួសបែកមាត់និងពកក្បាល​ ទើបគាត់ក៏បាន​រត់គេចចេញពីផ្ទះ​យក​រួចខ្លួន​ដើម្បីឲ្យគេជួយ។

ប្រភពដដែល​បា​នបញ្ជាក់​ថា​ កន្លងមក​ប្តី​របស់​គាត់តែងតែ​ប្រើប្រាស់​អំពើហិង្សា​ដាក់មកលើរូបគាត់ជាច្រើនលើកច្រើនសារ​ ប៉ុន្តែ​គាត់​មិន​បាន​ប្តឹងផ្ដល់​នោះទេ​ ព្រោះតែ​គាត់ស្រឡាញ់ប្តី​។

បើតាម​សម្តី​ពីបុរស​ជា​ប្តី​បាន​ឲ្យ​ដឹង​ថា​នៅមុន​ពេល​កើត​គាត់​និងប្រពន្ធ​បានទៅលេង​ផ្ទះបងស្រីរបស់គាត់​ថែមទាំង​មាន​ការ​ផឹកស៊ី​បន្តិចបន្តួច​ផងដែរ។ បន្ទាប់​មក​ពួកគាត់ក៏បាន​ត្រឡប់មកផ្ទះ​វិញ​ រួចគាត់ក៏បាននិយាយ​រឿងដែលត្រូវដូរផ្ទះ​ ហើយ​ប្រពន្ធរបស់គាត់ក៏បាន​អន់ចិត្ត​រួចក៏ចេញពីផ្ទះទៅផឹកស្រា​ថែម​។ រហូតដល់វេលាកើតហេតុ​ប្រពន្ធ​របស់គាត់បាន​មក​ដល់ផ្ទះ​វិញ​ទាំងសភាព​ស្រវឹង​ជោកជាំ​ ​បាន​មករករឿងឈ្លោះ​ជាមួយគាត់​បណ្តាលឲ្យ​មានការប្រតាយប្រតប់​គាត់​បែបនោះ។ ហើយកន្លងមក​ប្រពន្ធ​គាត់​តែង​តែ​ទៅផឹកស្រាស្រវឹង​ មក​រករឿងឈ្លោះជា​មួយគាត់​ ពេលដែលអន់ចិត្តនិងគាត់ស្តី​បន្ទោស​ម្តងៗ​។

ក្រោយ​ពេល​កើត​ហេតុ​សមត្ថកិច្ច​មូល​ដ្ឋាន​ក៏​បាន​ចុះ​មក​ដល់​កន្លែងកើហេតុ​ ប៉ុន្តែ​ស្ត្រី​ជា​ប្រពន្ធ​មិន​បាន​ប្តឹង​ផ្តល់​ទៅសមត្ថកិច្ច​នោះទេ​ គឺគ្រាន់តែ​សុំឲ្យ​ប្តី​ឈប់ប្រើប្រាស់​អំពើហិង្សា​ដាក់នាងទៀត​ ហើយសមត្ថកិច្ច​ក៏បាន​ធ្វើការ​អប់រំ​ណែនាំ​បុរស​ជា​ប្តី​នៅនិងកន្លែងកើតហេតុ​ ហើយបុរសជា​ប្តី​ក៏​សន្យា​ថា​ឈប់​ប្រើប្រាស់​អំពើហិង្សា​ដាក់ប្រពន្ធនៅចំពោះមុខសមត្ថកិច្ចផងដែរ​ រួចប្តីប្រពន្ធ​មួយ​គូនោះក៏ដឹកដៃ​គ្នា​ឡើង​ជិះ​ម៉ូតូ​ចេញទៅបាត់ទៅ៕

Loading...