ព្រះសីហនុ: លោកឧត្តមសេនីយ៍ត្រី អ៊ី សុខា ស្នងការរងទទួលផែនសណ្ដាប់ធ្នាប់ចរាចរណ៍ បានឲ្យដឹងថា នៅថ្ងៃទី១៧ ខែមករា ឆ្នាំ ២០១៩ នេះ ដោយមានការយកចិត្តទុកដាក់បញ្ជាណែនាំពីលោក យន្ត មីន អភិបាលខេត្តព្រះសីហនុ ក្រោមការណែនាំផ្ទាល់ ពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត លោកឧត្តមសេនីយ៍ត្រី អ៊ី សុខា បានដឹកនាំកម្លាំងនគរបាលចរាចរណ៍ផ្លូវគោក ចុះរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោកចំពោះរថយន្តដឹកដី ដឹកខ្សាច់ មិនគ្រប ធ្លាក់លើផ្លូវ និង រថយន្តធុនធំ ចូលទីក្រុង ខុសពេលវេលា ដោយបានឃាត់ទុករថយន្តល្មើស ចំនួន១១គ្រឿង មករក្សាទុកនៅការិយាល័យនគរបាលចរាចរណ៍ផ្លូវគោក មិនឲ្យធ្វើចរាចរមួយរយ: ដើម្បីធ្វើការព្រមាន ផាកពិន័យតាមច្បាប់។
លោកឧត្តមសេនីយ៍ត្រី អ៊ី សុខា ស្នងការរង ទទួលផែនសណ្តាប់ធ្នាប់ បានសំណូមពរ យ៉ាងទទូច សូមឲ្យម្ចាស់រថយន្ត ដឹកដី ដឹកខ្សាច់ ដឹកទំនិញទាំងអស់ ចូលរួមអនុវត្តន៍ច្បាប់ សេចក្តីជូនដំណឹង របស់រដ្ឋបាលខេត្តឲ្យបានត្រឹមត្រូវ ក្នុងករណីមានមន្ត្រីណាម្នាក់ បានប្រព្រឹត្តខុសឆ្គង សូមជួយរាយការណ៍ ជាបន្ទាន់ ដើម្បីអនុវត្តវិន័យរបស់កងកម្លាំងនគរបាលជាតិ ដោយមិនលើកលែងឡើយ៕
មតិយោបល់