ស្វាយរៀង: មានករណីគ្រោះថ្នាក់ចរាចរណ៍មួយបានកើតឡើង ក្រោយពីមានរថយន្តកុងតឺន័រមួយគ្រឿង បើកដឹកដែកបំពង់ទីបមួយដុំធំ ស្រាប់តែធ្លាក់ពីលើរថយន្ត ចំត្រូវបុរសម្នាក់ជិះម៉ូតូនៅខាងក្រោយបណ្តាលឲ្យរងរបួសធ្ងន់បាក់.កដៃខាងឆ្វេង បង្កការភ្ញាក់ផ្អើល កាលពីថ្ងៃទី២៣ ខែមករា ឆ្នាំ២០១៩ នៅលើផ្លូវជាតិលេខ១ ចន្លោះគីឡូម៉ែត្រលេខ១៥៧-១៥៨ នៅភូមិត្រពាំងផ្លុង សង្កាត់បាទី ក្រុងបាវិត ខេត្តស្វាយរៀង។
ជនរងគ្រោះមានឈ្មោះ យ៉ា សុជាតិ អាយុ៣៣ឆ្នាំ មុខរបរ រថយន្តដឹកដី ស្នាក់នៅភូមិដើមពោធិ ឃុំកណ្តៀងរាយ ស្រុកស្វាយទាប ខេត្តស្វាយរៀង ជិះម៉ូតូម៉ាក ហុងដា ស៊ីទី ពណ៌ក្រហម គ្មានស្លាកលេខ។
រថយន្តបង្កម៉ាក FUSO ពណ៌បៃតង ពាក់ស្លាកលេខ ភ្នំពេញ3A-4491 និងកន្ទយរឺម៉ក ពាក់ស្លាកលេខព្រះសីហនុ4A-1396 អ្នកបើកបរមិនស្គាល់អត្តសញ្ញាណ រត់គេចខ្លួនបាត់។
ក្រោយពេលកើតហេតុ សមត្ថកិច្ចបានចុះទៅដល់កន្លែងកើតហេតុ និងបាននាំយករថយន្តនិងម៉ូតូ២គ្រឿង មករក្សាទុកនៅអធិការដ្ឋាននគរបាលក្រុងបាវិត ដើម្បីកសាងសំណុំរឿងចាត់ការជាបន្តទៀត៕
មតិយោបល់