Post News Media ព័ត៌មានជាតិ រថយន្តកូរ៉េ ឈ...

រថយន្តកូរ៉េ ឈប់ចតចោល ត្រូវម៉ូតូពន្លះពីក្រោយ ផ្ដាច់ជីវិតបុរសម្នាក់

ភ្នំពេញ: ករណីគ្រោះថ្នាក់ចរាចរណ៍មួយ រវាងម៉ូតូបុករថយន្ត បណ្តាលឲ្យស្លាប់មនុស្សម្នាក់ កាលពីវេលាម៉ោង៨និង៣០នាទីយប់ថ្ងៃ សុក្រ ទី២៥ខែមករាឆ្នាំ២០១៩នៅចំណុចមុខវត្តក្តីចាស់​ ក្នុងភូមិបាក់ខែង សង្កាត់ បាក់ខែង​ ខណ្ឌជ្រោយចង្វារ រាជធានីភ្នំពេញ។

ជនរងគ្រោះ (សព) មានឈ្មោះញឹម ផន ភេទប្រុស អាយុ៣៨ឆ្នាំជនជាតិខ្មែរ មុខរបរជាងសំណង់​ ស្នាក់នៅម្តុំវត្តសំរោងអណ្តែត​ សង្កាត់ភ្នំពេញថ្មី ខណ្ឌសែនសុខ។ មានប្រពន្ធនិងកូនតូចមួយ។

សមត្ថកិច្ច បានឲ្យដឹងថា​ មុនពេលកើតហេតុគេឃើញ រថយន្តកូរ៉េមួយគ្រឿង ពណ៍ខៀវ​ ពាក់ស្លាក់លេខភ្នំពេញ 2Y.8042 ដឹកបន្លែ ធ្វើដំណើរពីកើតទៅលិច តាមបណ្តោយផ្លូវជាតិលេខ៦អា​ មកដល់ចំណុចកើតហេតុ បានឈប់ដោយមិនបានដាក់ សញ្ញាបំភ្លឺនោះទេ ស្រាប់តែមានម៉ូតូមួយគ្រឿង ឌ្រីមសង់ ១២៥ ស៊េរី២០១២ ពណ៌ខ្មៅ បិតពណ៌ខៀវ ពាក់ស្លាកលេខ ភ្នំពេញ1BM.0973 ជិះតាមបណ្តោយផ្លូវជាតិ៦A ស្របទិសគ្នា មិនប្រយ័ត្ន ក៏បុក ចំកាងដែកខាងក្រោយ បណ្តាលឲ្យបាក់កស្លាប់តែម្តង។

ក្រោយកើតហេតុ តៃកុងរថយន្តបានបើករថយន្ត ចេញពីកន្លែងកើតហេតុ ប្រហែល៣០០ម៉ែត្រទៅ៤០០ម៉ែត្រ ក៏ត្រូវបានប្រជាពលរដ្ឋឃាត់បាន ប្រគល់ឲ្យសមត្ថកិច្ច។

បច្ចុប្បន្នរថយន្ត និងម៉ូតូ ត្រូវបានយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ ដើម្បីចាត់ការតាមនិតិវិធី ចំណែកសពប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕

Loading...