ភ្នំពេញៈ ជនសង្ស័យជួញដូរ និងប្រើប្រាស់ថ្នាំញៀនចំនួន៤នាក់ ត្រូវកម្លាំងកងរាជអាវុធហត្ថខណ្ឌសែនសុខ ចុះបង្ក្រាបនិងឃាត់ខ្លួនទាំងសំបុក កាលពីវេលាម៉ោង៧យប់ ថ្ងៃទី២៥ ខែមករា ឆ្នាំ២០១៩ត្រង់ចំណុច បន្ទប់ជួលអត់លេខផ្លូវលំ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។
ប្រតិបត្តិការចុះបង្ក្រាបនេះ បន្ទប់ពីកម្លាំងកងរាជអាវុធហត្ថខណ្ឌសែនសុខ បានធ្វើការស្រាវជ្រាវ និងស៊ើបអង្កេត ក្រោមការចង្អុលបង្ហាញពីលោកមេបញ្ជាការកងរាជអាវុធហត្ថខណ្ឌ រួមទាំងបានការអនុញ្ញាតពីព្រះរាជអាជ្ញាអមសាលាដំបូងរាជធានីភ្នំពេញលោក កែវ សុធា។ កម្លាំងកងរាជអាវុធហត្ថខណ្ឌសែនសុខ ក៏បានធ្វើការចុះបង្ក្រាប និងឆែកឆេរជាក់ស្ដែងត្រង់ចំណុចខាងលើតែម្ដង។
ជាលទ្ធផលក្រោយនៃប្រតិបត្តិការណ៍នេះ កម្លាំងកងរាជអាវុធហត្ថខណ្ឌសែនសុខ បានឃាត់ជនសង្ស័យចំនួន៤នាក់ ដកហូតថ្នាំញៀនប្រភេទម៉្សៅក្រាមសថ្លាចំនួន២កញ្ចប់តូច និង១កញ្ចក់ធំល្មម និងឧបករណ៍សម្រាប់ជក់ លក់មួយចំនួនទៀត រួមទាំងមួយគ្រឿងម៉ាក ស៊ុយស័រគីនិច ពណ៌ស ពាក់ស្លាកលេខ កណ្ដាល 1Q-7468។
ជនសង្ស័យទី០១ឈ្មោះ មិន សីហា ភេទប្រុស អាយុ១៩ឆ្នាំ មុខរបរមិនពិតប្រាកដ។ ទី០២មានឈ្មោះ មិន ស៊ីការ៉ូ ភេទប្រុស អាយុ២៥ឆ្នាំ មុខរបរមិនពិតប្រាកដ។ ទី០៣ មានឈ្មោះ ហុង វ៉េងឈាង ភេទប្រុស អាយុ១៩ឆ្នាំ មុខរបរមិនពិតប្រាកដ។ ទី០៤មានឈ្មោះ ណុយ ម៉ាត់នី ភេទប្រុស អាយុ២៤ឆ្នាំ មុខរបរមិនពិតប្រាកដ ជនសង្ស័យទាំង៤នាក់នេះស្នាក់នៅចំណុចខាងលើ។
បច្ចុប្បន្នជនសង្ស័យទាំង៤នាក់រួមនិងវត្ថុតាំងត្រូវកម្លាំងកងរាជអាវុធហត្ថខណ្ឌសែនសុខកសាងសំណុំរឿង បញ្ជូនទៅឃុំខ្លួននៅកងរាជអាវុធហត្ថរាជធានីភ្នំពេញដើម្បីរងចាំបញ្ជូនបន្តទៅតុលាការ ចាត់ការទៅតាមនីតិវិធីច្បាប់ជាបន្តទៀត៕
មតិយោបល់