បន្ទាយមានជ័យ: លោកនេន១អង្គ ព្រះនាម រ៉ាន់ ភារុំ ភេទប្រុស ព្រះជន្ន១៨វស្សា គង់នៅវត្តតាសល់ ភូមិតាសល់ ឃុំចំណោម រងរបួសធ្ងន់ត្រង់គល់.កខាងឆ្វេង ដោយសារបុរសម្នាក់ គ្មានទីលំនៅពិតប្រាកដ យកកាំបិតចិតបន្លែចាក់ ។
ពាក់ព័ន្ធនឹងករណីនេះ លោកវរសេនីយ៍ឯក ស៊ិន ណារ៉ាក់ អធិការនគរបាលស្រុកមង្គលបូរី បានឲ្យដឹងថា៖ នៅមុនពេលកើតហេតុ ថ្ងៃទី០៤ ខែកុម្ភ: ឆ្នាំ២០១៩ វេលាម៉ោង ១១និង៣០នាទីយប់ មានករណីអំពើហិង្សាដោយចេតនា១ កើតឡើងនៅក្នុងវត្តតាសល់ ភូមិតាសល់ ឃុំចំណោម ដែលបង្កឡើងដោយឈ្មោះ ចក់ វុទ្ធី ភេទប្រុស អាយុ៣២ឆ្នាំ នៅភូមិតាសល់ ឃុំចំណោម បានផឹកស្រវឹង ហើយបានយកកូនកាំបិតចិតបន្លែ ទៅភ្ជង់.កលោកនេន បណ្តាលឲ្យរងរបួសត្រង់គល់.ក ខាងឆ្វេង ឈាមហូរយ៉ាងច្រើន។
ប្រភពដដែលបន្តថា៖ ក្រោយពីបង្កឲ្យលោកនេន មានរបួស ជនសង្ស័យ បានយកកាំបិតចិតបន្លែនោះ ទៅជៀរខ្សែភ្លើង រួចអារដៃឆ្វេងខ្លួនឯង បណ្តាលឲ្យដាច់សរសៃឈាម ត្រូវបានបញ្ជូនទៅមន្ទីរពេទ្យបង្អែកមិត្តភាព កម្ពុជា-ជប៉ុន ស្រុកមង្គលបូរី ។ ចំណែកលោកនេន ត្រូវបានគ្រូពេទ្យមកព្យាបាលនៅវត្ត។
ជនសង្ស័យជាមនុស្សអណាថា ស្នាក់នៅក្នុងវត្ត ហើយតែងតែផឹកស្រាស្រវឹង រករឿងលោកគ្រប់ៗ អង្គមិនដែលខាន។ ករណីនេះ បន្ទាប់ពីព្យាបាលរួចជនសង្ស័យ ត្រូវបានកម្លាំងជំនាញព្រហ្មទណ្ឌស្រុក រៀបចំសំណុំរឿង បញ្ជូនមកស្នងការដ្ឋាននគរបាលខេត្ត ដើម្បីចាត់ការបន្តតាមនិតិវិធីច្បាប់៕
មតិយោបល់