ភ្នំពេញ: រថយន្តលុចស៊ិស៥៧០ស៊េរីទំនើបមួយគ្រឿង ខណ:អ្នកបើកបរស្រវឹង បានរេចង្កូតទៅបុកខឿនសួនច្បារ ពុះចែកទ្រូងផ្លូវយ៉ាងពេញទំហឹង បណ្តាលឲ្យបែកកង់ ក្រឡាប់ផ្ងារជើងមួយចំហៀង តែសំណាងល្អមិនមានគ្រោះថ្នាក់ដល់ជិះនៅក្នុងរថយន្ត ។
ហេតុការណ៍នេះ បានកើតឡើងនៅវេលាម៉ោង១ និង៣០នាទី រំលងអាធ្រាត្រ ឈានចូលថ្ងៃទី៦ ខែកុម្ភ: ឆ្នាំ២០១៩ ត្រង់ចំណុចគុលស្ពានមុនីវង្សចាស់ត្រើយខាងកើត ផ្លូវជាតិលេខ១ សង្កាត់ច្បារអំពៅ២ ខណ្ឌច្បារអំពៅ។
តាមប្រភពពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរសបីនាក់ ដែលគេស្គាល់ថា ជាកូនថៅឈើ នៅច្បារអំពៅ បានបើករថយន្ត ម៉ាកលុចស៊ិស ៥៧០ ពណ៌ស ពាក់ស្លាកលេខ ភ្នំពេញ 2U -0777 ធ្វើដំណើរពីកើតទៅលិចតាមផ្លូវជាតិលេខ១ ក្នុងល្បឿនលឿនដូចហោះ ព្រមទាំងអ្នកបើកស្រវឹងផងនោះ មកដល់ចំណុចកើតហេតុ ស្រាប់តែរេចង្កូត ទៅខាងឆ្វេងដៃ ជ្រុលទៅបុកនិងខឿនសួនច្បារពុះចែកផ្លូវ យ៉ាងពេញទំហឹង បណ្តាលឲ្យបែកកង់ និងបាក់រទិលខាងឆ្វេង ធ្វើឲ្យរថយន្ត ក្រឡាប់ផ្ងារជើងមួយចំហៀងតែ សំណាងមិនបង្ករគ្រោះថ្នាក់ដល់មនុស្សដែលជិះនៅក្នុងរថយន្ត ។
ភ្លាមនោះអ្នកបើកបរ ដែលមានជាតិស្រវឹងទោរទន់រូបនោះ ត្រូវបានសមត្ថកិច្ចប៉ុស្តិ៍នគរបាលច្បារអំពៅ២ឃាត់ខ្លួន តែការឃាត់ខ្លួននេះ មិនបានដឹកជនបង្កយកទៅប៉ុស្តិ៍នគរបាលនោះទេ គឺដឹកអ្នកបើកបរ យកទៅផ្ទះតែម្តង។
ក្រោយពេលកើតហេតុ រថយន្តបង្ករត្រូវបានសមត្ថកិច្ច ឲ្យម្ចាស់ស្ទូចយកទៅជួសជួលដោយខ្លួនឯង ដោយមិនខ្វល់ពីការខូចខាតសម្បត្តិរបស់រដ្ឋនោះទេ៕
មតិយោបល់