ផ្ទះ ព័ត៌មានជាតិ សង្ស័យមកពីមិន...

សង្ស័យមកពីមិនទាន់អស់ចិត្តទើប អតីត​ប្តី​ទៅ​គោះ​ទ្វារ​បន្ទប់​អតីត​ប្រពន្ធ…..

0

ភ្នំពេញ: ​អ​តី​តប្រពន្ធ និង​ប្តី​បានកើតជាសង្រ្គាម ក្រោយ​ពី​លែងលះ​គ្នា​អស់​រយ:ពេល​ជាង​១​ខែ ស្រាប់តែ​អតីត​ប្តី​ទៅ​បន្ទប់​ខាង​អតីត​ប្រពន្ធ​គោះ​ទ្វារ​ហៅ​បំណង​យក​ទូរទស្សន៍​របស់​ខ្លួន តែ​ដោយសារ​ការ​មិន​ទុកចិត្ត​ខ្លាច​តាម​មក​រករឿង កកូរកកាយ​ផ្លូវចិត្ត ឬ​រាង​កាយ​ក្លាយជា​ទំនាស់​សម្តី ផ្អើល​អស់​ប៉ូលិស​ ដោយសារ​រឿង​ទូរទស្សន៍​កញ្ចាស់​មួយ​គ្រឿង​ត្រូវ​កម្លាំង​នគរបាល​ប៉ុស្តិ៍​ចោម​ចៅ​១ ចុះ​ទៅ​អន្តរាគមន៍​សាកសួរ​កាលពី​ម៉ោង​៩​និង​២០​នាទី​យប់ ថ្ងៃ​ទី​០៩ ខែកុម្ភ: ឆ្នាំ​២០១៩ ស្ថិត​នៅ​បន្ទប់​ជួល​ខាងក្រោយ​ផ្សារ​ឯករាជ្យ​១ ក្នុងភូមិ​ត្រពាំង​ថ្លឹង សង្កាត់​ចោម​ចៅ​១ ខណ្ឌ​ពោធិ៍​សែន​ជ័យ រាជធានីភ្នំពេញ ។

​ភាគី​ខាង​អតីត​ប្តី​មានឈ្មោះ សុខ រី អាយុ​៣៣​ឆ្នាំ មុខរបរ​កម្មករ​រោងចក្រ ស្នាក់​នៅ​បន្ទប់​ជួល​ក្នុងភូមិ​ត្រពាំង​ថ្លឹង សង្កាត់​ចោម​ចៅ​១ ចំណែក​ស្ត្រី​អតីត​ប្រពន្ធ​មានឈ្មោះ សាត សោភា អាយុ​២៥​ឆ្នាំ មុខរបរ​កម្មការិនី​រោងចក្រ ស្នាក់​នៅ​បន្ទប់​ជួល កន្លែង​កើតហេតុ ។

​តាម​សម្តី​ភាគី​ខាង​ប្រុស​បាន​ឲ្យ​ដឹង​ថា ខ្លួន​បាន​រៀប​ការ​ជាមួយ​ស្ត្រី​ខាងលើ​ជិត​៤​ឆ្នាំ​ហើយ មាន​មេបា​ចាស់ទុំ​សងខាង​ដឹង​ឮ សំពះ​ផ្ទឹម​ក្បាល​ក្រាប​ដល់​កន្ទេល​ត្រឹមត្រូវ​ទៅ​តាម​ប្រពៃណី មានកូន​ស្រី​អាយុ​៣​ឆ្នាំ​ជា​ចំណងអាពាហ៍ពិពាហ៍ ក៏​ប៉ុន្តែ​វិ​ថី​ជីវិត​ស្ន​ហារ​វាង​ប្តី​-​ប្រពន្ធ​ត្រូវ​បាន​បញ្ចប់​ត្រឹម​ឆ្នាំ​ទី​៤​ក្រោយ ក៏​ដោយសារ​ការ​រស់នៅ​មិន​ចុះសម្រុង​គ្នា ទីបំផុត​ឯកភាព​គ្នា​ទៅ​ស្រុក​ចំពោះ​មុខ​ឪពុក​ម្តាយ​សងខាង មាន​ទាំង​អាជ្ញាធរ​មូលដ្ឋាន​ដឹង​ឮ​ផង សម្រេចចិត្ត​ចែកផ្លូវ​គ្នា ផ្តាច់​ទាំង​សង្វាស់ ចំពោះ​កូនស្រី​បាន​ទៅ​លើ​ខាង​ប្តី​ជា​អ្នក​បីបាច់ ថែរក្សារ។
តាមប្រភពបាន​បន្ត​ទៀត​ថា ការ​ចែកផ្លូវ​គ្នា​ដើរ​រវាង​ប្តី​ប្រពន្ធ​អស់​រយ:ពេល​ជាង​១​ខែ​ទៅ​ហើយ ថ្វី​ត្បិត​តែ​របរ​ការងារ រួម​រោងចក្រ​ជាមួយ​គ្នា​ពិតមែន តែ​ពេល​នេះ​ក្លាយជា​មនុស្ស​ទីទៃ​ពី​គ្នា​ទៅ​ហើយ ជួល​ផ្ទះ​ផ្សេង​គ្នា ហើយ​មុន​កើតហេតុ​នេះ​បន្ទាប់​ពី​ខ្លួន​ទៅ​រក​យក​ទូរទស្សន៍​កញ្ចាស់​មួយ​ជា​ទ្រព្យ​របស់​ខ្លួន​នៅ​សែសសល់​ក្នុង​បន្ទប់​អតីត​​ប្រពន្ធ លុះ​ពេល​ដែល​គោះ​ទ្វារ​ហៅ​សួរនាំ​រឿង​យក​ទូរទស្សន៍ បែរជា​អតីត​ប្រពន្ធ​ចោទ​ខ្លួន​ថា មក​តាម​រករឿង​ក៏​ទាស់​ពាក្យ​សម្តី ស្រី​ទូរស័ព្ទ​ប្តឹង​ប៉ូលិស​ថា ខាង​ប្តី​មក​រករឿង​ទៅ​វិញ ។

បើ​តាម​សម្តី​ភាគី​ខាង​ស្ត្រី​ជា​អតីត​ប្រពន្ធ​វិញបាន​ឲ្យ​ដឹង​ថា ខ្លួន​បាន​លែងលះ​គ្នា​ជាមួយ​ប្តី​ហើយ ចុះ​ហេតុ​អ្វី តែ​រឿង​ទូរទស្សន៍​មួ​យមក​តោងទាម​យក​ទៅ​វិញ​ទាំង​កណ្តាល​យប់​បែប​នេះ ហើយ​កន្លង​មក ក្រោយ​លែងលះ​អតីត​ប្តី​ចេះ​តែ​បោះពាក្យ​សម្តី​ក្នុង​ន័យ​គំរាម ហាក់បីដូចជា​ចង់​ប្រចណ្ឌ​រហូត​មក​ដល់​លើក​នេះ​មក​ដល់​បន្ទប់​ហើយ​រករឿង​ទៀត ។

សម្តី​ចោទប្រកាន់​របស់​អតីត​ប្រពន្ធ​ត្រូវ​បាន​បុរស​ខាងលើ​បដិសេធ​ច្រានចោល​ទាំងអស់ ខ្លួន​គ្មាន​ចេតនា​វិល​មក​រក​ស្នេហ៍​ចាស់​វិញ​នោះ​ឡើយ កាល​មក​គោះ​ទ្វារ​ហៅ​ពេល​នេះ ក៏​ព្រោះតែ មក​រក​យក​ទូរទស្សន៍​ជា​ទ្រព្យ​របស់​ខ្លួន​នៅ​សេសសល់​ទេ ហើយដោយ​ពេល​ថ្ងៃ​ជាប់រវល់ ទើប​អូស​បន្លា​យមក​វេលា​យប់​បែប​នេះ កុំ​ចេះ​តែ​ចោទ ! ។

ទោះជា​យ៉ាងណា​ក្តី សម្តី​ខាង​ស្រី​ចាក់ទឹកមិនលេច ខាង​ប្រុស​ក៏​មិន​ចេះ​គេច ប៉ូលិស​ហៅ​នាំ​ទៅ​សម្រប​សម្រួល​គ្នា​នៅ​ប៉ុស្តិ៍ ដើម្បី​បញ្ឈប់​សង្គ្រាម​សម្តី​ដាក់​គ្នា កាលបើ​ស្នេហ៍​បែកបាក់​ធ្លុះធ្លាយ ដូច​កញ្ជើធ្លុះ​គូទ​ទៅ​ហើយ កិច្ចសន្យា​ចែកផ្លូវ​គ្នា​រៀងខ្លួន​បញ្ចប់រឿង​ទូរទស្សន៍​កញ្ចាស់​មួយ​គ្រឿង ៕

Leave a Reply

This site uses Akismet to reduce spam. Learn how your comment data is processed.