ភ្នំពេញ: ករណីរថយន្តមួយគ្រឿង សង្ស័យអ្នកបើកស្រវឹងស្រា បានបើកដឹកនារីម្នាក់ ក្នុងល្បឿនយ៉ាងលឿន ជ្រុលចង្កូតទៅបុកបង្កាន់ដៃស្ពានប្រឡាយទឹកស្អុយ បណ្តាឲ្យដាក់កង់ទៅមុខលែងរួច
ហេតុការណ៍នេះ បានកើតទ្បើងកាលពីវេលាម៉ោង ៤និង១៥នាទីទៀបភ្លឺឈានចូលថ្ងៃទី១២ ខែកុម្ភ: ឆ្នាំ២០១៩ មានត្រង់ចំណុចស្ពានថ្មប្រឡាយទឹកស្អុយខាងលិខផ្សារដើមគ តាមបណ្ដោយផ្លូវ៣៣៦ ស្ថិតក្នុងសង្កាត់បឹងសាឡាង ខណ្ឌទួលគោក។
សមត្ថកិច្ច បានឲ្យដឹងថា នៅមុនពេលកើតហេតុគេឃើញបុរសម្នាក់និងនារីម្នាក់ បានបើកបររថយន្តម៉ាកលុចស៊ីស RX300 ពណ៌ស ពាក់ស្លាលេខ ភ្នំពេញ2AR-9457 ធ្វើដំណើរពីលិចទៅកើតតាមបណ្ដោយផ្លូវ៣៣៦ ក្នុងល្បឿនយ៉ាងលឿន សង្ស័យថាអ្នកបើកស្រវឹង។ មកដល់ចំណុចខាងលើ បានជ្រុលចង្កូតទៅបុកបង្គោលបង្កាន់ដៃស្ពានទាំងកម្រោល បណ្ដាលឲ្យបាក់ទ្រេតមួយបង្គោល។ ខណ:រថយន្តបង្កនៅបន្តដំណើរទៅមុខបានប្រមាណជិត៥០ម៉ែត្រ ទើបអស់ល្បឿនទៅលែងរួច។
ក្រោយពេលកើតទាំងអ្នកបើក និងអ្នករួមដំណើរលើរថយន្តគេចខ្លួនបាត់ ហើយសមត្ថច្ចជំនាញ ក៏បានចុះមកធ្វើការវាស់វែង ស្ទូចយករថយន្តបង្កខាងលើទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំដោះស្រាយពេលក្រោយ៕
មតិយោបល់