ឧត្តរមានជ័យៈ សមត្ថកិច្ចប៉ុស្តិ៍រដ្ឋបាលកូនក្រៀល ចុះបង្ក្រាបក្រុមក្មេងទំនើង២ក្រុម សរុប២៤នាក់រឹបអូសបានវត្ថុតាងបទល្មើសមួយចំនួនធំ ដែលប្រុងបង្កសកម្មភាពវាយតប់គ្នា តាមផ្លូវសាធារណៈ កាលពីវេលាម៉ោង៣និង៣០នាទី ថ្ងៃទី៧ ខែកក្កដា ឆ្នាំ២០១៦ នៅចំណុចផ្សារទួលស្វាយ។
សមត្ថកិច្ច បានឲ្យដឹងថា បន្ទាប់ពីមានសេចក្ដីរាយការណ៍មកថា មានករណីឈ្លោះប្រកែក ដេញវាយតប់គ្នា រវាងក្រុមក្មេងទំនើង២ក្រុម៖ ក្រុមទី១ មកពីអូរស្មាច់ម៉ូតូ១១គ្រឿង មានគ្នា១០នាក់ និងក្រុមទី២ អន្លង់វែង៦ទៅ៧ម៉ូតូ ក្រោយហេតុការណ៍កើតឡើងកំលាំងនគរបាលវរសេនាតូចការពារព្រំដែនគោក លេខ៩០៥ ឃាត់ខ្លួនក្មេងទំនើង២នាក់ និងបានចាត់តាំងកំលាំងគោលដៅ នៅអក្ស T និង នគរបាលប៉ុស្តិ៍រដ្ឋបាលកូនក្រៀល ឃាត់បានជាបន្តបន្ទាប់ សរុប២៤នាក់ ភាគច្រើនមានអាយុ១៥ ទៅ១៩ឆ្នាំ។
សមត្ថកិច្ចយើង បានដកហូត ដាវសាំរ៉ៃ០២ដើម ដែកទីប០១ប្រវែង៨សង់ស៊ីម៉ែត្រ ដែកថ្នាំងអំពៅ១ប្រវែង ៦សង់ស៊ីម៉ែត្រ ទូរស័ព្ទថៃ២១គ្រឿង។ ករណីខាងលើនេះ ពុំមានបង្កឲ្យរបួសស្នាមភាគីណាម្នាក់នោះទេ។
បច្ចុប្បន្ន សមត្ថកិច្ចបញ្ជូនមកស្នងការដ្ឋាននគរបាលខេត្តឧត្តរមានជ័យ ដើម្បីសាកសួរនឹងធ្វើតេស្ដរកសារធាតុញៀន និងរងចាំអាណាព្យាបាលមកធានា និងធ្វើកិច្ចសន្យា៕
មតិយោបល់