ភ្នំពេញៈ កំលាំងនគរបាលខណ្ឌដូនពេញ និងកម្លាំងនគរបាលប៉ុស្តិ៍ស្រះចកបានចេញប្រតិបត្តិការចុះបង្ក្រាបការជួញដូរគ្រឿងញៀនជាក់ស្តែង ដោយឃាត់ខ្លួនជនសង្ស័យប្រុសស្រី៤នាក់ ព្រមទាំងដកហូតថ្នាំញៀន និងឧបករណ៍ប្រើប្រាស់មួយចំនួន កាលពីរសៀលថ្ងៃទី០៨ ខែកក្កដាឆ្នាំ២០១៦នេះ នៅចំណុចផ្លូវរថភ្លើងក្នុងភូមិ៣ សង្កាត់ស្រះចក ខណ្ឌដូនពេញ ។
សមត្ថកច្ចខណ្ឌដូនពេញបានឲ្យដឹងថា ក្រុមជនសង្ស័យជនសង្ស័យដែលឃាត់ខ្លួនចំនួន០៤នាក់ ទី១ឈ្មោះ ឌុន តូច ភេទប្រុស អាយុ២៥ឆ្នាំ ទី២ឈ្មោះហួសាង ហៃ ភេទប្រុស អាយុ ៣៥ឆ្នាំ ទី៣ឈ្មោះ សេក រស្មី ភេទប្រុស អាយុ២៧ឆ្នាំ និងទី៤ឈ្មោះប៊ុនស្រី លឹង ភេទស្រី អាយុ១៥ឆ្នាំ។ ជនសង្ស័យទាំង៤នាក់ខាងលើ មានមុខរបប និងកន្លែងស្នាក់នៅមិនពិតប្រាកដ។
បើតាមប្រភពព័ត៌មានពីម្ចាស់ផ្ទះបានឲ្យដឹងថា ជនសង្ស័យខាងលើ មិនបានជួលផ្ទះរបស់គាត់ទេ ហើយគាត់បានប្រាប់ឲ្យពួកគេចេញពីបន្ទប់ផ្ទះជួលរបស់គាត់ តែពួកគេមិនស្ដាប់ថែមគាស់ផ្ទះគាត់ចូលសង្ងំជក់គ្រឿងញៀន និងគំរាមធ្វើបាបដល់គាត់ទៀតផង។
សមត្ថកិច្ចនគរបាលខណ្ឌដូនពេញបានឲ្យដឹងថា មុនពេលចុះប្រតិបត្តិការ កម្លាំងប៉ុស្តិ៍ស្រះចក និងកម្លាំងខណ្ឌដូនពេញបានចេញល្បាតនៅមូលដ្ឋាន ក៏បានទទួលព័ត៌មានសម្ងាត់ថា មានជនសង្ស័យ១ក្រុម មានប្រុស និងស្រីកំពុងតែសង្ងំជួញដូរ និងប្រើប្រាស់គ្រឿងញៀននៅចំណុចផ្ទះកើតហេតុខាងលើ កម្លាំងព្រហ្មទណ្ឌខណ្ឌដូនពេញ និងកម្លាំងមូលដ្ឋានចុះទៅបង្ក្រាបភ្លាមៗ ដោយឃើញក្រុមជនសង្ស័យទាំងនោះកំពុងតែប្រើប្រាស់គ្រឿងញៀនជាក់ស្តែង ទើបកម្លាំងបានឃាត់ខ្លួនទាំង០៤នាក់ គឺប្រុស០៣នាក់ និងស្រីម្នាក់ ព្រមទាំងដកហូតវត្ថុតាងថ្នាំញៀនចំនួន០៤កញ្ចប់តូចរួមទាំងឧបករណ៍ប្រើប្រាស់ថ្នាំញៀនមួយចំនួនទៀត បញ្ជូនមកអធិការនគរបាលខណ្ឌដូនពេញ ដើម្បីកសាងសំណុំរឿងចាត់ការតាមនិតិវិធី៕
មតិយោបល់