ភ្នំពេញៈ ស្ត្រីម្នាក់មានវិបត្តិនៅក្នុងគ្រួសារដោយសារតែប្តី និងកូនធ្វើបាប ក៏បានសម្រេចចិត្តជិះម៉ូតូឌុបឡើងទៅលើស្ពានជ្រោយចង្វាចាស់ បម្រុងនឹងលោតទឹកសម្លាប់ខ្លួន តែត្រូវបានសិស្សសាលាមួយក្រុម បានឃើញហើយជួយឃាត់ទាន់ពេល។ ហេតុការណ៍នេះបានកើតឡើងកាលពីម៉ោង៩និង៤០នាទីព្រឹក ថ្ងៃទី០៨ ខែកក្កដា ឆ្នាំ២០១៦ ដែលនៅត្រង់ចំណុចលើស្ពានជ្រោយចង្វាចាស់ សង្កាត់ស្រះចក ខណ្ឌដូនពេញ រាជធានីភ្នំពេញ ។
ស្ត្រីដែលបម្រុងលោតទឹកសម្លាប់ខ្លួននោះ មានឈ្មោះ ហុង សុគន្ធា អាយុ ៤៧ឆ្នាំ មុខរបរ ជាអតីតថៅកែងហាងនំហុង អ៊ីងហ្វុង នៅម្តុំផ្សារដើមគរ បច្ចុប្បន្នស្នាក់នៅផ្ទះជួល សង្កាត់វត្តភ្នំ ខណ្ឌដូនពេញ រាជធានីភ្នំពេញ។ ចំណែកឯប្តីមានឈ្មោះ គីម សុភ័ក្រ ហៅ នុត សំអុល មុខរបរប៉េអឹម ផ្ទៃប្រទេស។
បើតាមការបញ្ជាក់ពីស្ត្រីដែលចង់លោតទឹកសម្លាប់ខ្លួននោះ បានរៀបរាប់ទាំងទឹកភ្នែកថា ដោយសារតែមានវិបត្តិនៅក្នុងគ្រួសារ ប្តី និងកូនប្រុសម្នាក់បានធ្វើបាប និងបំផ្លាញទ្រព្យសម្បត្តិអស់ រហូតដល់ឥឡូវមកជួលផ្ទះគេនៅ ទើបរូបគាត់បានសម្រេចចិត្តមកលោតទឹកសម្លាប់ខ្លួនតែម្តង។ ក្រោយមកស្ត្រីខាងលើបានប្រាប់ថា ដំបូងឡើយគាត់មានផ្ទះនៅម្តុំផ្សារដើមគរ ហើយបានបើកហាងលក់នំមួយកន្លែងនៅទីនោះ ដែលមានយីហោ ហុង អ៊ីងហ្វុង ហើយរូបគាត់មានកូន ៥នាក់ ស្រី២ ប្រុស៣។
ស្ត្រីខាងលើបានបន្តទៀតថា មូលហេតុដែលនាំឲ្យគាត់ចង់សម្លាប់ខ្លួននោះ គឺដោយសារតែប្តីរបស់គាត់មិនបានគិតពីគ្រួសារទេ ហើយថែមទាំងដើរមានស្រី និងមិនគិតគូរក្នុងគ្រួសារ និងម្តាយរបស់គាត់ទេ ដោយថែមទាំងបានចោទគាត់ថា បានលេងល្បែងស៊ីសងទៀត ហើយបានរត់ចោលក្រុមគ្រួសាររយៈពេល១៣ឆ្នាំមកហើយ។
ក្រោយមក រូបគាត់ក៏បានបែកគំនិតបើកហាងធ្វើនំដែលមានយីហោ ហុង អ៊ីងហ្វុង នៅម្តុំផ្សារដើមគរ ជាមួយនិងកូនៗ របស់គាត់ទាំង ៤នាក់ ។ បន្ទាប់មក ប្តីរបស់គាត់ឃើញក្រុមគ្រួសាររកស៊ីមានបានក៏សម្រេចចិត្តត្រឡប់មករស់នៅជាមួយគ្នាវិញបានរយៈពេល ៣ឆ្នាំ និងមានកូនស្រីម្នាក់ នៅពេលដែលកូនស្រីពៅអាយុបានជាងមួយខួប ប្តីរបស់គាត់ក៏បានរត់ចោលក្រុមគ្រួសារទៅនៅជាមួយម្តាយ ដោយមានស្រីញី លែងខ្វល់ពីក្រុមគ្រួសារគាត់ទៀតហើយ ។
នៅពេលដែលប្តីរបស់គាត់រត់ចោលម្តងទៀត គាត់ក៏បានទៅជួលផ្ទះដែលធ្វើនំនៅម្តុំផ្សារដើមគរនោះ ហើយបានទៅខ្ចីលុយពីធនាគារចំនួន ៦ម៉ឺនដុល្លារ ដើម្បីយកមកបើកហាងធ្វើនំថ្មីមួយកន្លែងទៀតនៅព្រែកតាម៉ាក់ ដោយមានកូនប្រុសច្បងរបស់គាត់ជាអ្នកធ្វើនំតែម្តង និងមានកម្មករជិត ២០នាក់ផងដែររួចមក កូនប្រុសច្បងរបស់គាត់ឈ្មោះ សិដ្ឋ ដែលជាអ្នកធ្វើនំនោះ បានមកបំផ្លាញអស់គ្មានសល់ ហើយកូនប្រុសរបស់គាត់យកលុយនោះ ទៅលេងល្បែង និងផឹងស៊ី រហូតគ្មានលុយបើកឲ្យកម្មករ ទើបរូបគាត់ក៏សម្រេចចិត្តលក់ផ្ទះនៅម្តុំផ្សារដើមគរ ដើម្បីយកប្រាក់នោះ បើកឲ្យកម្មករ និងបង់ឲ្យធនាគារ ។
ស្ត្រីរូបនោះបានបន្តថា រូបគាត់បានមកជួលផ្ទះគេនៅម្តុំវត្តភ្នំ ដោយប្រកបរបរជាអ្នកលាងចានឲ្យបងប្អូន ក្នុងមួយថ្ងៃ គេឲ្យប្រាក់ ១៥០០០រៀល ។
លុះព្រឹកឡើង មុនពេលរូបគាត់បានទៅលោតទឹកសម្លាប់ខ្លួននោះ រូបគាត់បានតេទូរស័ព្ទទៅប្តីរបស់គាត់ ដោយបានប្រាប់ថា ពេលគាត់ស្លាប់ទៅឲ្យជួយយកកូនស្រី ២នាក់ទៅចិញ្ចឹមផង តែត្រូវប្តីឆ្លើយមកវិញថា រវល់ហាត់នៅបន្ទាយ អត់បានទៅយកទេ ហើយគាត់ក៏បានបិតទូរស័ព្ទ។ ក្រោយមករូបគាត់ក៏បានហៅម៉ូតូឌុបជិះមកស្ពានជ្រោយចង្វា ដើម្បីលោតទឹកសម្លាប់ខ្លួនតែម្តង។ ខណៈពេលជិះមកដល់លើស្ពានជ្រោយចង្វាក៏បានឲ្យលុយទៅម៉ូតូឌុបរួចបានដើរបានបន្តក៏ដោះស្បែកជើងឡើងលើបង្កាន់ដៃស្ពានបំរ៉ុងលោតទឹកសម្លាប់ខ្លួន តែសំណាងសិស្សសាលាមួយក្រុម បានបើកម៉ូតូមកដល់ ឃើញដូចនេះ ក៏បានជួយឃាត់ទាន់ពេល ហើយបានទៅហៅប្រជាការពារដែលប្រចាំការនៅគល់ស្ពានជ្រោយចង្វា នាំមកប៉ុស្តិ៍នគរបាលជ្រោយចង្វា ដើម្បីសួរនាំស្វែងរកបងប្អូន៕
មតិយោបល់