ភ្នំពេញៈ គ្រោះថ្នាក់ចរាចរណ៍មួយ បង្កឡើងដោយបុរស ស្រវឹងស្រាជោកជាំម្នាក់ បើករថយន្តលឿន ទៅបុករ៉ឺម៉កកង់បីអូសជាច្រើនម៉ែត្រ បណ្ដាលឲ្យជនជាតិបរទេស២នាក់បានស្លាប់នៅនឹងកន្លែង ចំណែកឯអ្នកបើកម៉ូតូរ៉ឺម៉កស្លាប់ពេលបញ្ជូន ទៅកាន់មន្ទីរពេទ្យ។
ហេតុការណ៍នេះ បង្កឲ្យមានការភ្ញាក់ផ្អើលកាលពីវេម៉ោង២និង០០នាទីយប់ រំលងអាធ្រាត ថ្ងៃទី២ ខែមីនា ឆ្នាំ២០១៩ នៅតាមបណ្ដោយផ្លូវព្រះស៊ីសុវត្ថិ កែងផ្លូវលេខ១៨៤ ស្ថិតក្នុងសង្កាត់ជ័យជំនះ ខណ្ឌដូនពេញ ។
តាមមន្រ្តីនគរបាលមូលដ្ឋាន បានប្រាប់ឲ្យដឹងថា នៅមុនពេលកើតហេតុ គេឃើញរថយន្តមួយគ្រឿង ម៉ាក LEXUS RX330 ពណ៌ខ្មៅ ពាក់ស្លាក ភ្នំពេញ 2AX-5853 បើកបរដោយបុរសម្នាក់ ក្នុងល្បឿនលឿនតាមបណ្ដោយផ្លូវព្រះស៊ីសុវត្ថិ ក្នុងទិសដៅពីត្បូងទៅជើង លុះមកដល់ចំណុចមុខកើតហេតុ ស្រាប់តែរថយន្តរេចង្កូត ងាកមកខាងឆ្វេងជ្រុលទៅបុករ៉ឺម៉កកង់បីចំពេញមួយទំហឹង បណ្ដាលឲ្យជនជាតិបរទេស២នាក់ស្លាប់ភ្លាមៗនៅនឹងកន្លែង ចំណែកឯអ្នកបើករ៉ឺម៉កស្លាប់ ពេលបញ្ជូនទៅកាន់មន្ទីរពេទ្យកាល់ម៉ែត ។
ក្រោយកើតហេតុ សមត្ថកិច្ចបានឃាត់ខ្លួនអ្នកបើកបរ យកទៅប៉ុស្តិ៍នគរបាលជ័យជំនះ ដើម្បីសាកសួរ ។
ចំណែកសពជនរងគ្រោះ ត្រូវបានសមត្ថកិច្ចដឹកយកទៅតម្កល់នៅឯវត្តស្ទឹងមានជ័យ ដើម្បីរង់ចាំសាច់ញាតិមកទទួលយក ៕
មតិយោបល់