ភ្នំពេញៈ មន្រ្តីនគរបាលប៉ុស្តិ៍បឹងកក់២ម្នាក់ បានជិះម៉ូតូមួយគ្រឿង​ PCX ឈប់ចតទុកនៅមុខអេ​ អឹម ម៉ាត (AM Mart) រួចដើរចូលទៅខាងក្នុង Mart អង្គុយផឹកស្រាបៀរABC តែមិនដឹងថា​ខ្លួនភ្លេចដកសោរម៉ូតូនោះទេ លុះពេលផឹកអស់មួយកំប៉ុង ​ស្រាប់តែលោកប៉ូលិសចេញមកវិញបាត់ម៉ូតូ ស្រឡះមុខចែសតែម្ដង។
ហេតុការណ៍ភ្ញាក់ផ្អើលនេះបានកើតឡើងនៅវេលាម៉ោង១០និង១០នាទីយប់ថ្ងៃទី២ ខែមិនា ឆ្នាំ២០១៩ នៅមុខផ្សារទំនើបមួយកន្លែង​យីហោ​ អេអឹម​ ម៉ាត (AM Mart) នៅតាមបណ្តោយផ្លូវ៥៩៨ ជាប់ផ្លូវរថភ្លើងត្រឡោកបែក ស្ថិតក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ ។
ម៉ូតូដែលចោរយកទៅបាត់នោះ​ ម៉ាក Honda PCX ពណ៌ស ពាក់ស្លាកលេខភ្នំពេញ 7682 (មិនចាំអក្សរក្បាលទេ) ។
ប្រភពព័ត៌មានពីកន្លែងកើតហេតុបានឲ្យដឹងថា​ នៅមុនពេលកើតហេតុ​ គេឃើញមន្រ្តីនគរបាលខាងលើ បានជិះម៉ូតូមកឈប់ចតទុកនៅមុខអេ​ អឹម ម៉ាត (AM Mart) រួចដើរចូលទៅខាងក្នុង Mart ហើយអង្គុយផឹកស្រាបៀរABC តែមិនដឹងថា​ខ្លួនភ្លេចដកសោរម៉ូតូនោះទេ បន្តិចក្រោយមក​ជនមិនស្គាល់មុខ មកយកម៉ូតូជិះចេញទៅបាត់ស្រមោល។
ប្រភពបន្តថា​ ​ស្រាប់លោកប៉ូលិសចេញមកវិញបាត់ម៉ូតូ ទោះផឹកអស់ទើបតែអស់មួយកំប៉ុង ក៏ស្រឡះមុខចែសដែរ ព្រោះចោរលួចម៉ូតូទៅបាត់ហើយ​ ទើបគាត់​រាយការណ៍​បោះដៃតាម​វិទ្យុទាក់ទង​ឲ្យសមត្ថកិច្ចតាមគោលដៅដទៃទៀត​ ជួយមើលភិនភាគម៉ូតូ PCX ពណ៌ស ពាក់ស្លាកលេខភ្នំពេញ 7682 (មិនចាំអក្សរក្បាល)​ ដែលត្រូវបានចោរលួចជិះចេញទៅបាត់​ ៕