ភ្នំពេញ: បុរសជាជនជាតិចិនម្នាក់ បើករថយន្តហាយឡែនឌ័រមួយគ្រឿង ក្នុងស្ថានភាពស្រវឹងជោកជាំ ទៅបុកបង្កាន់ដៃស្ពានអាកាស៧មករា ផ្នែកខាងលិច ស្ថិតក្នុងសង្កាត់ទឹកថ្លាខណ្ឌសែនសុខ រួចព្យាយាមបើករត់គេចចេញពីកន្លែងកើតហេតុ ត្រូវប្រជាការពារសង្កាត់ទឹកថ្លា ជិះដេញតាម និងស្ទាក់ចាប់បាននៅក្បែរខារ៉ាអូខេអង្គរសមរិទ្ធ តាមបណ្ដោយផ្លូវ១៨២ ស្ថិតក្នុងសង្កាត់ទឹកល្អក់ទី៣ ខណ្ឌទួលគោក កាលពីវេលាម៉ោង១១និង២០នាទីយប់ ថ្ងៃទី០៧ ខែមីនា ឆ្នាំ២០១៩។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញបុរសជាជនជាតិចិនម្នាក់ ស្រវឹងជោកជាំ បានបើកបររថយន្តមួយគ្រឿងម៉ាក លុចសRX300 ពណ៌ទឹកប្រាក់ ពាក់ស្លាកលេខ ភ្នំពេញ2AL-5899 ធ្វើដំណើរពីលិចទៅកើតតាមបណ្ដោយមហាវិថីសហព័ន្ធរុស្ស៊ីដោយ ក្នុងល្បឿនយ៉ាងលឿន។
មកដល់ចំណុចកើតហេតុ ក៏ស្រាប់តែរថយន្តរេចង្កូត ជ្រុលទៅបុកនិងបង្កាន់ដៃស្ពានអាកាស បណ្ដាលឲ្យរថយន្តរងការខូចខាតក្រពឹតផ្នែកខាងមុខចំហៀងខាងឆ្វេង។ ភ្លាមៗនោះរថយន្តបង្ក ព្យាយាមបន្ថែមល្បឿនបើករត់គេចខ្លួន តែក៏ត្រូវបានប្រជាការពារសង្កាត់ទឹកថ្លាឃើញហេតុការណ៍ ក៏ជិះដេញតាមពីក្រោយរហូតដល់ចំណុចខាងលើ ទើបអាចស្ទាក់ចាប់បាន។
ក្រោយពេលកើតហេតុសមត្ថកិច្ចមូលដ្ឋាន ក៏បានចុះមកដល់កន្លែងកើតហេតុ បានទាក់ទងសមត្ថកិច្ចជំនាញឲ្យចុះមកធ្វើការវាស់វែង យករថយន្តបង្កទៅរក្សាទុកនៅឯការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើដោះស្រាយទៅតាមផ្លូវច្បាប់៕
មតិយោបល់