បន្ទាយមានជ័យ: យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា ជនសង្ស័យម្នាក់ ជំនាញកាច់សោ.កម៉ូតូនៅរាជធានីភ្នំពេញ ហើយមកធ្វើសកម្មភាពកាច់សោ.កម៉ូតូនៅខេត្តបន្ទាយមានជ័យ ត្រូវកម្លាំងនគរបាលខេត្តបន្ទាយមានជ័យ ឃាត់ខ្លួនបាននៅវេលាម៉ោង៣និង១៥នាទីរសៀល ថ្ងៃទី១៤ ខែមីនា ឆ្នាំ២០១៩នៅចំណុចកន្លែងកម្សាន្តអាងហែល ប៊ីអឹមស៊ី ស្ថិតនៅភូមិគោរដ្ឋាន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ខណ:ដែលជនសង្ស័យ កំពុងធ្វើសកម្មភាពកាច់សោ.កម៉ូតូមិនបានសម្រេច ។
នាយការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តបន្ទាយមានជ័យ លោកវរសេនីយ៍ឯក ខែម សោភ័ណ្ឌ ប្រាប់ឱ្យដឹងថា ជនសង្ស័យឈ្មោះ ផៃ សុភាព ភេទប្រុស អាយុ៣៥ឆ្នាំ មុខរបរមិនពិតប្រាកដ មានទីលំនៅរស់នៅភូមិ-សង្កាត់តាំងក្រសាំងខណ្ឌដង្កោ រាធានីភ្នំពេញ បានធ្វើសកម្មភាពចូលលួច (កាច់សោ.កម៉ូតូ) នៅចំណុចអាងហែល ប៊ីអឹមស៊ី ក្រុងសិរីសោភ័ណ ម្តងរួចមកហើយ ប៉ុន្តែមិនបានសម្រេចដោយសារម្ចាស់ម៉ូតូបានឃើញ ហើយជននេះក៏រត់គេចខ្លួនបាត់។
លុះមកដល់ថ្ងៃទី១៤ ខែមីនា ជនសង្ស័យបន្តមកធ្វើសកម្មភាពកាច់សោ.កម៉ូតូម៉ាកហុងដាស៊េរី ឆ្នាំ២០១៨ ពណ៌ខ្មៅ របស់ជនរងគ្រោះឈ្មោះ ហួត កញ្ញា ភេទស្រី អាយុ៣៣ឆ្នាំ មុខរបរ លក់ដូរ រស់នៅភូមិ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ខណ:ជនរងគ្រោះទុកម៉ូតូនៅក្នុងកន្លែងអាងហែលទឹករំពេចនោះកម្លាំងនគរបាលបប្រចាំការនៅចំណុចនោះដេញចាប់ឃាត់ខ្លួនបានតែម្តង ។
បើតាមចម្លើយសារភាពពីជសង្ស័យឈ្មោះផៃ សុភាព ប្រាប់ថា រូបគេធ្លាប់ ធ្វើកម្មករសំណង់នៅប្រទេសថៃ ការចេះជំនាញកាច់សោ.កម៉ូតូគឺមានពួកម៉ាកបង្ហាត់បង្រៀន នៅប្រទេសថៃ។ រូបគេនៅភ្នំពេញ មកដល់ខេត្តបន្ទាយមានជ័យ តាមរយ:ស្រីស្នេហ៍ទំនាក់ទំនងគ្នាតាមទូរស័ព្ទ ។ បច្ចុប្បន្ន ជនសង្ស័យត្រូវបានកម្លាំងជំនាញកសាងសំណុំរឿងចាត់ការតាមផ្លូវច្បាប់៕
មតិយោបល់