ភ្នំពេញ: បុរសម្នាក់ បើកបររថយន្តលុចស៊ីស RX330មួយគ្រឿងបោះពួយយ៉ាងលឿន មិនប្រយ័ត្នក៏ជ្រុលទៅបុករថយន្តរបស់ក្រុមហ៊ុនស្រាបៀរកម្ពុជា ចំពាក់កណ្តាលពេញទំហឹង បណ្តាលឲ្យរងការខូចខាតទាំងសងខាង កាលពីវេលាម៉ោង១០យប់ថ្ងៃទី១៩ ខែមិនា ឆ្នាំ២០១៩ ត្រង់ចំណុចខាងត្បូងផ្សារក្រមួនប្រមាណ១០០ម៉ែត្រ តាមបណ្ដោយផ្លូវ១០០៧ កែងនិងផ្លូវ១៩៨២ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញបុរសម្នាក់ បើកបររថយន្តមួយគ្រឿង ម៉ាក KIA ពណ៌ក្រហម រថយន្តរបស់ក្រុមហ៊ុនស្រាបៀរកម្ពុជា ពាក់ស្លាកលេខ ភ្នំពេញ2AF-4082 ធ្វើដំណើរពីជើងទៅត្បូតាមបណ្ដោយផ្លូវ១០០៧ ក្នុងល្បឿនលឿន។ មកដល់ចំកើតហេតុរថយន្តខាងលើ បានបើកឆ្លងកាត់ផ្លូវ១៩៨២ ឆ្ពោះទៅមុខ ស្របពេលនោះក៏មានរថយន្តមួយគ្រឿងទៀត ម៉ាកលុចស៊ីស RX330 ពណ៌ស ពាក់ស្លាកលេខ ភ្នំពេញ2AP-8324 បើកកបរដោយបុរសម្នាក់ធ្វើដំណើរពីកើតទៅលិច តាមបណ្ដោយផ្លូវ១៩៨២ ក្នុងល្បឿនយ៉ាងលឿន មិនប្រយ័ត្នក៏ជ្រុលចង្កូត ទៅបុករថយន្តរបស់ក្រុមហ៊ុនស្រាបៀរកម្ពុជា ចំពាក់កណ្តាលពេញទំហឹង បណ្តាលឲ្យក្រពឹតមួយចំហៀងខាងឆ្វេងយ៉ាងដំណំ ចំណែកឯរថយន្តលុចស៊ីសរងការខូចខាតក្រពឹតកាងផ្នែកខាងមុខ ប៉ុន្តែមិនបង្កឲ្យមានអ្នករងរបួសនោះទេ។
ក្រោយពេលកើតហេតុសមត្ថកិច្ចមូលដ្ឋាន ក៏ចុះមកដល់ចំណុចកើតហេតុ ហើយបានឲ្យភាគីទាំងពីរធ្វើការដោះស្រាយសម្របសម្រួលគ្នា ដើម្បីបញ្ចប់រឿង ប៉ុន្តែដោយភាគីទាំងពីរធ្វើដោះស្រាយគ្នាមិនត្រូវ សមត្ថកិច្ចមូលដ្ឋាន ក៏ទាក់ទងហៅសមត្ថកិច្ចជំនាញចរាចរណ៍ឲ្យចុះមកវាស់វែង យករថយន្តទាំងពីរទៅរក្សាទុកនៅអធិការដ្ឋាននគរបាលខណ្ឌសែនសុខ ដើម្បីរង់ចាំធ្វើការដោះស្រាយគ្នា តាមផ្លូវច្បាប់ជាបន្តទៀតនៅពេលក្រោយ៕
មតិយោបល់