Post News Media ព័ត៌មានជាតិ សិស្សសាលាម្នា...

សិស្សសាលាម្នាក់ ភ្លេចដកសោម៉ូតូទុក ត្រូវលោកចោរលួចជិះយកទៅបាត់

កណ្ដាល: មានករណីអំពើលួច (ម៉ូតូ) ស្ថិតនៅភូមិតាដោល២ ឃុំអំពៅព្រៃ ស្រុកកណ្តាលស្ទឹង ខេត្តកណ្តាល កាលពីវេលាម៉ោង ១០និង១០នាទីយប់ថ្ងៃទី ០៩ ខែមេសា ឆ្នាំ២០១៩។

ជនរងគ្រោះឈ្មោះ រិទ្ធ ពិសី ភេទប្រុស អាយុ ១៧ឆ្នាំ រស់នៅភូមិជ្រៃរយោង ឃុំកណ្តោក ស្រុកកណ្តាលស្ទឹង ខេត្តកណ្តាល មុខរបរ សិស្ស ។ ជនសង្ស័យឈ្មោះ ស្រូយ ផានិត ភេទប្រុស អាយុ ២៤ឆ្នាំ មានទីលំនៅភូមិរាយដប ឃុំសៀមរាប ស្រុកកណ្តាលស្ទឹង ខេត្តកណ្តាល មុខរបរ មិនពិតប្រាកដ។

សម្ភារបាត់បង់រួមមាន៖
-ម៉ូតូ ០១គ្រឿង ម៉ាក ស៊ុយហ្សុយគីនិច ពណ៌ទឹកមាស ស៊េរីឆ្នាំ២០១៨ ពាក់ស្លាកលេខ 1HD-3596
-ទូរស័ព្ទដៃ ១គ្រឿង ម៉ាក ហៃយ៉ា
-ខោ២ អាវ១ ។

ដំណើររឿងដំបូង៖ មុនពេលកើតហេតុថ្ងៃទី ០៩ ខែមេសា ឆ្នាំ២០១៩ វេលាម៉ោង ៥និង១២នាទីល្ងាច ជនរងគ្រោះជិះម៉ូតូ ម្នាក់ឯងទៅផ្សារតាខ្មៅថ្មី ទិញខោ អាវ ទិញរួចក៏ជិះម៉ូតូ មកជួបសង្សារនៅកញ្ចុះ ភូមិជើងព្រៃ៣ មួយសន្ទុះក្រោយមក ក៏ឌុបសង្សារទៅផ្ទះ នៅភូមិតាដោល ហើយក៏មកមើលគេរាំធុងបាស នៅវត្តភូមិតាដោល បានជួបមិត្តភក្ដិឈ្មោះ ហុង ភេទប្រុស ចំណែកឈ្មោះ ស្រូយ ផានិត ដែលជាជនសង្ស័យ ខ្លួនមិន ដែលស្គាល់ទេ ពេលនោះជនរងគ្រោះទុកម៉ូតូដោយ មិនបានដកសោ ចេញទេពីព្រោះអាងខ្លួននៅឈរជិតម៉ូតូ។

ខណ:នោះ ជនសង្ស័យអង្គុយនៅលើម៉ូតូ ហើយក៏បញ្ឆេះម៉ូតូជនរងគ្រោះ ជិះចេញទៅបាត់ រំពេចនោះជនរងគ្រោះ ដេញតាមតែតាមមិនទាន់ រហូតមកដល់វេលាម៉ោង ៩និង៤៥នាទីថ្ងៃទី ១១ ខែមេសា ឆ្នាំ២០១៩ បានមកដាក់ពាក្យបណ្ដឹង នៅប៉ុស្តិ៍រដ្ឋបាលឃុំអំពៅព្រៃ។

រហូតដល់ម៉ោង ១០និង៣០នាទី ជនរងគ្រោះ និងបងប្អូនឃើញជនសង្ស័យ នៅផ្ទះជួលភូមិស្រុកធំ សង្កាត់រលួស ខណ្ឌដង្កោ រាជធានីភ្នំពេញ ហើយបានឃាត់ខ្លួន នាំយកមកប្រគល់ជូនសមត្ថកិច្ចតែម្ដង។

បច្ចុប្បន្ន ជនសង្ស័យខាងលើ កម្លាំងជំនាញ កំពុងកសាងសំណុំរឿង បន្តចាត់ការតាមនីតិវិធីច្បាប់៕