បន្ទាយមានជ័យ: យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា នាយករងសាលាបឋមសិក្សារំពាក់ ស្ថិតក្នុងភូមិរំបាក់ ឃុំឈ្នួរមានជ័យ ស្រុកព្រះនេត្រព្រះ ខេត្តបន្ទាយមានជ័យ បានចង.ក ធ្វើអត្តឃាតសម្លាប់ខ្លួន នៅនឹងមែកដើមស្នាយមានកម្ពស់ ២,៥០ម៉ែត្រ។ ហេតុការណ៍បង្កឲ្យមានការភ្ញាក់ផ្អើលនេះ បានកើតឡើងនៅវេលាម៉ោង៤និង៥០នាទី ល្ងាចថ្ងៃទី១៩ ខែមេសា ឆ្នាំ២០១៩ នៅចំណុចខាងលិចសាលាបឋមសិក្សារំបាក់ ចម្ងាយ១៥០ម៉ែត្រ ។
តាមការឲ្យដឹងពីអធិការនគរបាលស្រុកព្រះនេត្រព្រះ គឺលោកវរសេនីយ៍ឯក មាស ប្ញទ្ធី បានឲ្យដឹងថា បុរសដែលចង.ក ធ្វើអត្តឃាតសម្លាប់ខ្លួន ឈ្មោះ កាន់ ភីឡា ភេទប្រុស អាយុ៥៣ឆ្នាំ នៅភូមិរំពាក់ ឃុំឈ្នួរមានជ័យ ស្រុកព្រះនេត្រព្រះ ខេត្តបន្ទាយមានជ័យ មានតួនាទីជានាយករង នៃសាលាបឋមសិក្សារំពាក់ ។
លោកអធិការក៏បានបញ្ជាក់ថា យោងតាមរបាយការណ៍របស់លោកមេភូមិរំបាក់ បានឲ្យដឹងថា នៅយប់ថ្ងៃទី១៨-០៤-២០១៩ ឈ្មោះកាន់ ភីឡា បានធ្វើបុណ្យឆ្លងចេតីយ៍ឪពុកក្មេក នៅក្នុងកម្មវិធីបុណ្យនេះ គាត់បានបម្រើភ្ញៀវជាធម្មតា និងមានការហូបស្រាបន្តិចបន្តួច រួមទាំងមានការរាំលេងកម្សាន្តសប្បាយ ជាមួយបងប្អូនជិតខាងផងដែរ ហើយរយ:កន្លងមកជារៀងរាល់ថ្ងៃ ឈ្មោះ ភីឡា នេះគឺតែងតែផឹកស្រាស្រវឹងជាប្រចាំផងដែរ។
បើតាមការបំភ្លឺ ពីឈ្មោះ យាវ កាន ភេទប្រុស អាយុ២៧ឆ្នាំ នៅភូមិរំពាក់ ជាមួយគ្នា បានប្រាប់សមត្ថកិច្ចថា នៅវេលាម៉ោង៤និង៥០នាទីល្ងាចថ្ងៃទី១៩ ខែមេសា ខ្លួនបានដើរកាត់ត្រង់ចំណុចព្រំរបងថ្នាលស្រែរបស់ឈ្មោះកាន់ ភីឡា (បុរសចង.ក) នៅខាងលិចសាលាបឋមសិក្សារំពាក់ចម្ងាយ១៥០ម៉ែត្រ ដើម្បីទៅមើលគោនិងអង្គប់ដាក់កណ្តុរពីថ្ងៃមុនផងនោះ ក៏ប្រទះឃើញជនរងគ្រោះឈ្មោះកាន់ ភីឡា ចង.កនៅនឹងមែកដើមស្នាយ។
លោកវរសេនីយ៍ឯក មាស ប្ញទ្ធី អធិការនគរបាលស្រុក ព្រះនេត្រព្រះ បានបញ្ជាក់ឲ្យដឹងថា ក្រោយពីទទួលបានព័ត៌មាន លោកបានចាត់កម្លាំងជំនាញបច្ចេកទេសវិទ្យាសាស្ត្រអធិការដ្ឋាននគរបាលស្រុក និងប៉ុស្តិ៍រដ្ឋ ចុះទៅពិនិត្យសាកសព ដោយសហការជាមួយអាជ្ញាធរភូមិឃុំ រួមទាំងសាច់ញាតិនិង គ្រូពេទ្យមណ្ឌលសុខភាពឃុំឃើញថា នៅលើខ្លួនសពឈ្មោះកាន់ ភីឡា គឺពុំមានស្នាកស្នាមអ្វីទាក់ទិននឹងករណីមនុស្សឃាតនោះទេ គឺពិតជាស្លាប់ដោយចង.ក ប្រាកដមែន ដោយបុរសរូបនេះ បានយកខ្សែលួសប្រវែង១ម៉ែត្រ ទំហំ២លី ចង.កនិងមែកដើមស្នាយ តែមូលហេតុបណ្តាលឲ្យធ្វើអត្តឃាតសម្លាប់ខ្លួន នៅមិនទាន់ដឹងនៅឡើយ។
ក្រោយពីធ្វើកោសល្យវិច័យរួច សពត្រូវបានប្រគល់ឲ្យប្រពន្ធ និងសាច់ញាតិចាត់ចែងធ្វើ បុណ្យតាមប្រពៃណី ៕
មតិយោបល់