ក្រចេះ: នារីវ័យក្មេងម្នាក់ត្រូវបានរថយន្តកូរ៉េបើកបុកពេញទំហឹង កាលពីវេលាម៉ោង៥និង៥៥នាទីល្ងាចថ្ងៃទី១១ ខែកក្កដា ឆ្នាំ២០១៦ នៅខាងកើតរូបគ្រុឌប្រហែល១០០ម៉ែត្រ ស្ថិតនៅភូមិស្រែស្ដៅ សង្កាត់អូរឫស្សី ក្រុងក្រចេះ បណ្ដាលឲ្យស្លាប់ នៅពេលយកទៅសង្រ្គោះនៅមន្ទីរពេទ្យ។

នគរបាលចរាចរណ៍ខេត្តបានប្រាប់ឲ្យដឹងថា រថយន្ដកូរ៉េចំណុះ១តោនកន្លះ បើកទិសដៅពីកើតទៅលិច លុះដល់ចំណុចកើតហេតុ បត់ឆ្វេងបណ្ដាលឲ្យបុកម៉ូតូហុង សេ១២៥ ពណ៌ខ្មៅ ពាក់ស្លាកលេខ ស្ទឹងត្រែង១A-២៩៤១ បណ្ដាលឲ្យជាអ្នកបើកម៉ូតូឈ្នោះ មាស ស្រីនិច អាយុ១៦ឆ្នាំ មានទីលំនៅភូមិឫស្សីចារ ស្រុកចិត្របុរី ខេត្តក្រចេះ ស្លាប់ក្រោយពេលបញ្ជូនទៅមន្ទីរពេទ្យ។

នគរបាលខេត្តបានបន្ដទៀតថា រថយន្ដនិងម៉ូតូត្រូវបានត្រូវយកទៅរក្សាទុកនៅអធិការដ្ឋាននគរបាលក្រុងក្រចេះ ចំណែកសាកសពប្រគល់ជូនគ្រុមគ្រួសារ យកទៅធ្វើបុណ្យតាមប្រពៃណី។

ដោយឡែកក្នុងថ្ងៃដដែលនោះផងដែរ នៅត្រុងចំណុចគីឡូម៉ែត្រ លេខ៣៨ភូមិស្រែថ្មី ឃុំឃ្សឹម ស្រុកស្នួល ខេត្តក្រចេះ នៅវេលាម៉ោងជាង៥ល្ងាចបុរសម្នាក់វ័យ១៦ឆ្នាំឈ្មោះ រី ប៉ាសីស ជនជាតិខ្មែរឥស្លាម រស់នៅអន្លង់រមៀត ឃុំសន្លប់ ស្រុកត្បូងឃ្មុំ ខេត្តត្បូងឃ្មុំ ជិះម៉តូដួលខ្លួនឯង បណ្ដាលឲ្យស្លាប់និងកន្លែងកើតហេតុ។ សពត្រូវបានគ្រួសារយកទៅធ្វើបុណ្យតាមប្រពៃណី៕