ភ្នំពេញ: ជម្លោះដ៏ចម្រូងចម្រាស់ រវាងភាគីអ្នកទិញដីខ្យល់ ជាមួយភាគីខាងក្រុមហ៊ុនលក់ដី ផ្តើមចេញពីអត់មានដីឲ្យអតិថិជន គ្មានលុយសងវិញ កើតជារឿងជម្លោះសម្តី ផ្អើលសមត្ថកិច្ច ចុះទៅសម្របសម្រួល កាលពីល្ងាចថ្ងៃទី០៦ ខែឧសភា ឆ្នាំ២០១៩ នៅទីស្នាក់ការលក់ដីឡូតិ៍ ក្នុងភូមិស្រែតេជ: សង្កាត់សំរោងក្រោម ខណ្ឌពោធិ៍សែនជ័យ ។

ក្រុមហ៊ុនលក់ដីខាងលើ យ៉ីហោ រៀល ប្រជេក ប៊ីហ្សនេស ឯ.ក ដែលមានអាស័យដ្ឋាន ផ្ទះលេខ៣៦ មហាវិថីឈ្នះឈ្នះ ក្នុងភូមិសង្កាត់កើតហេតុ។

តាមសម្តីភាគី ខាងអ្នកទិញឈ្មោះ សាន មឿន ភេទប្រុស អាយុ៤៥ឆ្នាំ បានឲ្យដឹងថា គាត់បានទិញដីបង់រំលោះ ពីក្រុមហ៊ុនខាងលើ បង់លុយជាតំណាក់កាល ហើយគាត់បង់អស់២៥០០ដុល្លារហើយ ក្នុងតម្លៃដី សរុប៩៨០០ដុល្លារ ហើយបង់ក្នុង១ខែ២០០ដុល្លារ បាន៥ខែ តែអ្វីដែលមិននឹកស្មានដល់ ខំបង់លុយអស់២៥០០ដុល្លារហើយ បែរជាក្រុមហ៊ុន មិនមានដីប្រគល់ឲ្យទៅវិញ សួរលិច ធ្លាយកើត សួរកើតធ្លាយជើង ទីបំផុត ទើបដឹងថា ក្រុមហ៊ុនលក់ដីខ្យល់ រកតែមួយបង្គីគ្មានផង ដើរតែចង្អុលដីគេ ម្តងដីនេះ ម្តងដីនោះ អស់ជម្រើស សន្យាប្រគល់ឲ្យលុយវិញ ហើយការសន្យាប្រគល់លុយវិញនោះទៀតសោត បើមិនបានគ្រប់ចំនួន តាមកិច្ចសន្យាទេនោះ ប្រគល់ឲ្យភាគីខាងម្ចាស់បំណុល ជាភាគីខាងអ្នកទិញដី រងគ្រោះ ចង់រុះរើយកតូប យកទីស្នាក់ការ ចង់អ្វីក៏យកទៅ ស្រាប់តែដល់ថ្ងៃកំណត់ក្រុមហ៊ុន ត្រូវប្រគល់លុយឲ្យវិញ ស្រាប់តែគ្មានបានមួយរៀល សម្តីយកមេឃទ្រាប់អង្គុយ តែលុយម្ចាស់បំណុលឲ្យសង ទើបភាគីរងគ្រោះ រុះរើ យកឥវ៉ាន់ នៅកន្លែង ទីស្នាក់ការយកប្រមូលលក់ឲ្យអស់ ទើបកើតជាទំនាស់សម្តី គ្រាដែលជនរងគ្រោះ រើយកឥវ៉ាន់ ។

តាមភាគីខាងក្រុមហ៊ុនលក់ដីខ្យល់ លោក ឈ្មោះ លី វ៉ាឌីណា មានទីលំនៅ ភូមិសង្កាត់កើតហេតុ មិនមានការបំភ្លឺជុំវិញដី ដែលលក់ឲ្យអតិថិជន ថានៅត្រង់ណាឡើយ ក្រោយពីជន ភាគីខាងអតិថិជនខ្លួន ប្រមូលឥវ៉ាន់ បែរជាឆ្កាដៃជើងឡាំប៉ា ខឹងប្តឹងប៉ូលិសទៅវិញ ទើបភាគីចោទសួរ ត្រង់ណាទៅកិច្ចសន្យាពិត ដីនៅត្រង់ណា ឯណាទៅលុយ ត្រូវសង ឲ្យតែគ្រប់ចំនួនតាមការសន្យាចប់រឿង ? ។

ភាពចម្រូងចម្រាស់គ្នា រវាងអ្នកលក់និងអ្នកទិញការប្រមូលយកឥវ៉ាន់ ត្រូវបានអាក់ខានទៅវិញ បន្ទាប់ពីអន្តរាគមន៍ពី សមត្ថកិច្ច អាជ្ញាធរ រងចាំរកដំណោះស្រាយដោយសន្តិវិធី តែភាគីខាងរងគ្រោះ បានលើកឡើងដែរថា កុំសន្យាខ្យល់ ឲ្យតែលុយគ្រប់ចប់រឿងហើយ ៕