ភ្នំពេញៈ យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា ជនសង្ស័យ២នាក់ បានលួចដែកបំពង់ទីបជ្រុង នៅការដ្ឋានសំណង់បុរីប៉េងហួត ផ្លូវជាតិលេខ១ ភូមិបឹងឈូក សង្កាត់និរោធ ខណ្ឌច្បារអំពៅ កាលពីថ្ងៃទី២៤ ខែឧសភា ឆ្នាំ២០១៩ វេលាម៉ោង ៧និង៣០នាទីយប់ ត្រូវសន្តិសុខឃាត់ខ្លួនប្រគល់ឲ្យសមត្ថកិច្ចចាត់ការតាមច្បាប់ ។
ជនរងគ្រោះដែលជាដើមបណ្តឹងឈ្មោះ ហេង រដ្ឋា ភេទប្រុស អាយុ៣៤ឆ្នាំ ជនជាតិខ្មែរ មុខរបរ សន្តិសុខបុរី ប៉េងហួត ស្នាក់នៅភូមិកណ្តាល សង្កាត់ រលួស ខណ្ឌដង្កោ ។
ជនសង្ស័យឈ្មោះ៖
១-ប៊ីន សាន ភេទប្រុស អាយុ២៣ឆ្នាំ ជនជាតិខ្មែរ មុខរបរ បើកបររថយន្ត។
២-ស៊ីម ពៅ ភេទប្រុស អាយុ២២ឆ្នាំ ជនជាតិខ្មែរ មុខរបរ ព្រូរថយន្ត។
ជនសង្ស័យទាំង២នាក់ ស្នាក់នៅភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ។
មុនពេលកើតហេតុ ជនសង្ស័យឈ្មោះ ប៊ិន សាន និងឈ្មោះស៊ីម ពៅ បើករថយន្តម៉ាក Hyundia ពណ៌ស ស្លាកលេខ ភ្នំពេញ ៣E-៤៦៤៧ ដឹកគ្រឿងសំណង់មកដាក់នៅការដ្ឋានសំណង់បុរីប៉េងហួត (ចំណុចកើតហេតុ) រួចក៏បានលួចដែកបំពង់ទីបជ្រុងចំនួន០៧ដើម ប្រវែង១.៥០ម៉ែត្រ ដាក់លើរថយន្តបើកចេញមកក្រៅ ក៏ត្រូវបានសន្តិសុខបុរីប៉េងហួត ឃាត់ត្រួតពិនិត្យរកឃើញដែកបំពង់ទីបជ្រុង៧ដើម ក៏ធ្វើការឃាត់ខ្លួនជនសង្ស័យទាំង២នាក់ រួមនិងវត្ថុតាងប្រគល់ឲ្យសមត្ថកិច្ច ចាត់ការតាមច្បាប់៕
មតិយោបល់