ភ្នំពេញ: នៅព្រឹកថ្ងៃទី១៤ ខែកក្កដា ឆ្នាំ២០១៦នេះ លោក កែវ មុនី ប្រធានក្រុមប្រឹក្សាចៅក្រមជំនុំជម្រះសាលាដំបូងរាជធានីភ្នំពេញ បានលើកយកសំណុំរឿង ឃាតកម្ម បាញ់សម្លាប់យុវជនម្នាក់ពេលចេញពីក្លឹបនៅខណ្ឌឫស្សីកែវ មកបន្តសវនាការដោយសាកសួរដេញដោលលើសាក្សី និងសមត្ថកិច្ចបន្ថែមទៀត។
ជនជាប់ចោទនៃសំណុំរឿងនេះមានចំនួន ៣នាក់៖
-ទី១ឈ្មោះ ហ៊ុន តូសីហា ភេទប្រុស អាយុ ២១ឆ្នាំ
-ទី២ឈ្មោះ អែម ផន ភេទប្រុស រត់គេចខ្លួន
-ទី៣ឈ្មោះ ហង់ សុភាព ហៅម៉ាប់ ភេទប្រុស ជាជនដៃដល់ រត់គេចខ្លួន
ចំណែកជនរងគ្រោះឈ្មោះ នូ ណារ៉េន ភេទប្រុស អាយុ ១៨ឆ្នាំ ត្រូវបានក្រុមជនជាប់ចោទបាញ់ចំក្បាលចំណុចសៀតផ្កាមួយគ្រាប់ស្លាប់នៅនឹងកន្លែងកាលពីម៉ោងប្រមាណ៤ទាបភ្លឺរំលងអាធ្រាត្រថ្ងៃទី០១ ខែកញ្ញា ឆ្នាំ២០១៦ នៅម្តុំក្លឹបនាគមាស សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
លោក តូច គឹមសុង នាយប៉ុស្តិ៍រដ្ឋបាលឫស្សីកែវបាន បញ្ជាក់ថា លោកបានដឹកនាំកម្លាំងផ្ទាល់ដោយសហការជាមួយកម្លាំងនគរបាលព្រហ្មទណ្ឌស្នងការរាជធានីភ្នំពេញ និងនគរបាលអធការដ្ឋានខណ្ឌទួលគោក ទើបចាប់បានជនជាប់ចោទឈ្មោះ ហ៊ុន តូសីហា ដែលបានជួលបន្ទប់ស្នាក់នៅក្នុងទឹកដីខណ្ឌទួលគោក។ លោកបន្តថា ក្រោយពីពីឃាត់ខ្លួនបានជនជាប់ចោទរូបនេះ សមត្ថកិច្ចរបស់លោកបាននាំជននេះទៅជួបនឹងសាក្សី នៅពេលនោះសាក្សីដែលបានអះអាងថា ពិតជាជនជាប់ចោទប្រាកដមែនដែលបានជិះម៉ូតូដឹកជនដៃដល់បាញ់ប្រហារលើជនរងគ្រោះ។ បន្ទាប់មកសមត្ថកិច្ចជំនាញបានកសាងសំណុំរឿងបញ្ជូនមកតុលាការតែម្តងដើម្បីចាត់ការតាមនីតិវិធី។
សាក្សីឈ្មោះ ហ៊ី លីហ្សា ជាមិត្តភក្តិជនរងគ្រោះបានអះអាងថា នៅយប់កើតហេតុខ្លួន និងជនរងគ្រោះបានចូលរាំលេងក្នុងក្លឹបនាគមាស ពេលនោះជនរងគ្រោះ និងក្រុមជនជាប់ចោទបានឈ្លោះប្រកែកគ្នារហូតចេញមកក្រៅត្រូវក្រុមជនជាប់ចោទជិះម៉ូតូដេញគប់ដុំថ្ម។ សាក្សីដដែលបន្ថែមថា លុះមួយសន្ទុះក្រោយមកស្រាប់តែជនជាប់ចោទឈ្មោះ ហ៊ុន តូសីហា ជិះម៉ូតូម៉ាក ហុងដា មកឌុបជនដៃដល់ម្នាក់ទៀតមកបាញ់ជនរងគ្រោះចំសៀតផ្កាស្លាប់តែម្ត។
នៅក្នុងសវនាការជនជាប់ចោទឈ្មោះ ហ៊ុន តូសីហា បានបដិសេធថា ខ្លួនមិនបានប្រព្រឹត្តដូចការចោទប្រកាន់នោះទេ។
លោក នូ ដាវីតូ ជាឪពុកជនរងគ្រោះ និងជាដើមបណ្តឹងរដ្ឋប្បវេណី បានប្តឹងទាមទារសំណងជំងឺចិត្តពីជនជាប់ចោទចំនួន ១៥,០០០ដុល្លារ។
សំណុំរឿងនេះ ត្រូបានលោក កែវ មុនី ប្រធានក្រុមប្រឹក្សាចៅក្រមជំនុំជម្រះសាលាដំបូងរាជធានីភ្នំពេញ សម្រេចលើកពេលទៅប្រកាសសាលក្រមនៅព្រឹកថ្ងៃទី៥ ខែសីហា ឆ្នាំ២០១៦ខាងមុខវិញ៕
មតិយោបល់