ព័ត៌មានជាតិ

ខ្លាំងបាត់! យុវជនម្នាក់​ប្រទូស្ដ​កេរ្តិ៍ខ្មាស់ទៅលើស្រ្តីសមត្ថកិច្ចចុះអន្តរាគមន៍ទាញកាំបិតបុ័ងតោ​គំរាម​កាប់​

ភ្នំពេញ: យោងតាមផេកអគ្គស្នងការដ្ឋាននគរបាលជាតិ បានឲ្យដឹង នៅវេលាម៉ោង ៣និង២០នាទីថ្ងៃទី៥ ខែមិថុនា ឆ្នាំ២០១៩ សមត្ថកិច្ច​ឃាត់ខ្លួន​ជនសង្ស័យ​ម្នាក់ ពីបទ​ប្រទូស្ដ​កេរខ្មាស់​ និង​គំរាម​សម្លាប់​ប្រើ​កាំបិត​បុ័ងតោ​គំរាម​កាប់​សមត្ថកិច្ច​ ស្ថិតត្រង់ចំណុចផ្ទះជួលភូមិថ្មី សង្កាត់​ដង្កោ​ ខណ្ឌដង្កោ​ រាជធានី​ភ្នំពេញ។

​ជន​រង​គ្រោះ​ឈ្មោះ​ ថ​ ស ន​ ភេទ​ស្រី​ អាយុ​ ២០​ឆ្នាំ​ ជនជាតិ​ខ្មែរ​​ ។​
​ជនសង្ស័យ​ឈ្មោះ​ រស់​ នៅ​ ភេទ​ប្រុស​ អាយុ ​២៧​ឆ្នាំ​ ជនជាតិ​ខ្មែរ​ មុខរបរ​មិន​ពិតប្រាកដ​ ស្នាក់​នៅ​បន្ទប់​ជួល​ភូមិ​ថ្មី​ សង្កាត់​ដង្កោ​ ខណ្ឌដង្កោ​ រាជធានី​ភ្នំពេញ​។​

​វត្ថុ​តាង​ចាប់​យក​រួម​មាន​៖​ កាំបិត​បុ័ងតោ​ដង​ដែក​ចំនួន ​០១​ ។​

សភាពរឿងហេតុ​៖​ កាលពីវេលាម៉ោងកើតហេតុជន​រង​គ្រោះ​​ កំពុង​តែ​បោសសម្អាតក្នុង​បន្ទប់​ជួល​ ស្ថិត​នៅ​ភូមិ​ថ្មី​ សង្កាត់​ដង្កោ​ ខណ្ឌដង្កោ​ រាជធានី​ភ្នំពេញ​ ​ ពេល​នោះ​ស្រាប់តែ​ជនសង្ស័យបាន​ស្ទុះ​ចូល​មក​យកដៃ​ឆ្វេង​ ច្របាច់ក​ជន​រង​គ្រោះ​ ហើយ​ដៃស្ដាំ​រុញ​ខ្ទប់ទ្វារ​បិទ​បម្រុង​ចាប់រំលោភ​នារី​រង​គ្រោះ​ រួច​ជន​រង​គ្រោះ​រើបម្រះ​ស្រែក​ឲ្យ​អ្នក​ជិតខាង​ជួយ​ ហើយ​ជនសង្ស័យ​ក៏​បាន​ទាត់​ជន​រង​គ្រោះ​មួយ​ជើង​ត្រូវ​ចំ​ក្បាល​ផ្នែក​ខាងក្រោយ​ បណ្ដាល​ឲ្យពក​មួយ​កន្លែង​ ។​ បន្ទាប់មក​ក៏​មាន​អ្នក​ជិតខាង​ និង​កម្លាំង​សមត្ថកិច្ច​បាន​ទៅ​ដល់​កន្លែង​កើតហេតុ​ ជួយ​អន្ដរាគមន៍​ តែ​ជនសង្ស័យ​បាន​ទាញ​កាំបិត​បុ័ងតោ​ដង​ដែក​ពី​ចង្កេះ​ខោ​ខាងឆ្វេង​ស្រែក​គំរាម​កាប់សម្លាប់​សមត្ថកិច្ច​ មិន​ឲ្យចូល​ធ្វើ​អន្ដរាគមន៍​ ខណ:នោះ​ សមត្ថកិច្ច​ក៏​បាន​ស្ទុះ​ចូល​ប្រតាយប្រតប់​ជាមួយ​ជនសង្ស័យ​បណ្ដាល​ឲ្យ​រង​របួសស្រាល​ ទើប​ចាប់​ឃាត់ខ្លួន​ជនសង្ស័យ​បាន​ រួម​នឹង​វត្ថុ​តាង​ យក​ទៅ​សាកសួរ​នៅ​ប៉ុស្ដិ៍​នគរបាល​រដ្ឋបាល​ដង្កោ​តាម​នីតិវិធី​ច្បាប់​។

ក្រោយ​ពេល​សាកសួរ​ ជនសង្ស័យ​បាន​សារភាព​ថា​ រូបគេ​(​ជនសង្ស័យ​)​ ពិតជា​បាន​ធ្វើ​សកម្មភាព​ច្របាច់ក​ បម្រុង​ចាប់រំលោភ​លើ​ជន​រង​គ្រោះ​ និង​គំរាម​កាប់​សមត្ថកិច្ច​ ប្រាកដ​មែន​ ទើប​ជន​រង​គ្រោះ​ដាក់​ពាក្យបណ្ដឹង​ឲ្យ​សមត្ថ​កិច្ចចាត់ការ​តាម​ផ្លូវច្បាប់​តែ​ម្ដង​៕

មតិយោបល់