ភ្នំពេញៈ បុរសម្នាក់ បានស្លាប់ និង២នាក់ទៀត រងរបួសធ្ងន់ ដោយសារស្រវឹងស្រា ហើយបើកម៉ូតូក្នុងល្បឿនលឿនវ៉ារថយន្តកុងតឺន័រជ្រុលទៅបុងទ្រូងផ្លូវ កាលពីវេលាម៉ោង២៖៣០នាទី អធ្រាត្រឈានចូលថ្ងៃទី១៦ ខែកក្កដា ឆ្នាំ២០១៦ តាមបណ្តោយផ្លូវេងស្រេង នៅចំណុចមុខដេប៉ូតេលា ផ្សារឯករាជ្យ៣ ស្ថិតនៅក្នុងភូមិដំណាក់ធំ៣ សង្កាត់ស្ទឹងមានជ័យ ខណ្ឌមានជ័យ។

ប្រភពពីសមត្ថកិច្ចបានឲ្យដឹងថា ជនរងគ្រោះដែលស្លាប់មានឈ្មោះ អាង វ៉ា ភេទប្រុស អាយុ២២ឆ្នាំ មានស្រុកកំណើតនៅភូមិកំសោមអក ឃុំកំសោមអក ស្រុកកំពុងត្របែក ខេត្តស្វាយរៀង។

សមត្ថកិច្ចបន្តថា មុនពេលកើតហេតុ គេឃើញបុរស៣នាក់ ជិះម៉ូតូម៉ាក ហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ ភ្នំពេញ 1AO-7254 បើកបរតាមបណ្តោយផ្លូវវេងស្រេង ពីកើតទៅលិច ក្នុងស្ថានភាពស្រវឹងស្រាយ៉ាងលឿន។ លុះបើកមកដល់ចំណុចកើតហេតុ បុរស៣នាក់ខាងលើ ក៏វ៉ារថយន្តកុងតឺន័រដែលបើកបរស្របទិសគ្នា ប៉ុន្តែជនរងគ្រោះវ៉ាអត់ផុត ក៏ជ្រុលទៅបុកឃឿនពុះចែកទ្រូងផ្លូវ បណ្តាលឲ្យអ្នកទាំង៣នាក់ អូសជិត៥០ម៉ែត្រ។ ចំណែកអ្នកបើកម៉ូតូវិញ បានបោកនឹងឃឿនពុះចែកទ្រូងផ្លូវស្លាប់ភ្លាមៗ រីឯ២នាក់ទៀត រងរបួសធ្ងន់។

ក្រោយពេលកើតហេតុ រថយន្តសង្គ្រោះរបស់គ្លីនិកឯកជនក៏បានដឹកទៅសង្គ្រោះ ប៉ុន្តែដោយសារជនរងគ្រោះមានសភាពធ្ងន់ធ្ងរពេក ក៏បញ្ចូនបន្តទៅកាន់មន្ទីរពេទ្យកាលម៉ែត ចំណែកឯម៉ូតូជនរងគ្រោះវិញ ត្រូវសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌមានជ័យ៕

https://youtu.be/H0a4YWQifQ4