ផ្ទះ ព័ត៌មានជាតិ ផ្លូវជាតិលេខ២...

ផ្លូវជាតិលេខ២ និងលេខ២២ ត្រូវបានចុះហត្ថលេខាហើយ

0

ថ្ងៃទី២៥ ខែមិថុនា ឆ្នាំ២០១៩ នៅទីស្ដីការក្រសួងសាធារណការ និងដឹកជញ្ជូន ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញចុះហត្ថលេខាលើកិច្ចសន្យាគម្រោងសាងសង់ធ្វើឱ្យប្រសើរឡើងផ្លូវជាតិលេខ២ និងផ្លូវជាតិលេខ២២ រវាងក្រសួងសាធារណការ និងដឹកជញ្ជូន និងក្រុមហ៊ុនសាងសង់ HANSHIN Engineering & Construction Co., Ltd ដោយមានការចូលរួមពីថ្នាក់ដឹកនាំ មន្ត្រីរាជការនៃក្រសួងសាធារណការ និងដឹកជញ្ជូន តំណាងក្រុមហ៊ុនសាងសង់ និងតំណាងក្រុមហ៊ុនទីប្រឹក្សាបច្ចេកទេស។

សូមបញ្ជាក់ថា ការសាងសង់ផ្លូវជាតិលេខ២ ពីរង្វង់មូលតាខ្មៅ ទៅរង្វង់មូលអូរចំបក់ និងផ្លូវជាតិលេខ២២ ពីរង្វង់មូលអូរចំបក់ទៅកាន់ផ្សារអង្គតាសោម ប្រវែងសរុប ៧២,១៧គីឡូម៉ែត្រ សាងសង់ដោយក្រុម Hanshin Engineering and Construction Co., Ltd ត្រូួតពិនិត្យលក្ខណ:បច្ចេកទេសដោយក្រុមហ៊ុនទីប្រឹក្សាបច្ចេកទេស Joint Venture of Dasan Consultants Co., Ltd, ក្រុមហ៊ុន Dong II Engineering Consultants Co., Ltd, និងក្រុមហ៊ុន Seoyoung Engineering Co., Ltd ដោយប្រើប្រាស់ថវិកាជាង ៤៥លានដុល្លារអាមេរិក ក្រោមគម្រោងឥណទានសម្បទានពីរដ្ឋាភិបាលកូរ៉េ ចំណាយរយ:ពេល ៣០ខែ និងគ្រោងបើកការដ្ឋានសាងសង់នៅចុងឆ្នាំ២០១៩នេះ។

ថ្លែងក្នុងពិធីនេះ ឯកឧត្ដមទេសរដ្ឋមន្ត្រីបានគូសបញ្ជាក់ថា ក្រសួងសាធារណការ និងដឹកជញ្ជូនលែងទទួលយកផ្លូវធ្វើជាប់រហូតទៀតហើយ តែទទួលយកផ្លូវរឹងមាំ និងមានគុណភាពខ្ពស់តាមស្តង់ដាអន្តរជាតិ។ ទន្ទឹមនឹងនោះផងដែរ ឯកឧត្ដមទេសរដ្ឋមន្ត្រី បានណែនាំឱ្យក្រុមហ៊ុនសាងសង់ ក្រុមហ៊ុនទីប្រឹក្សាបច្ចេកទេស និងមន្ត្រីបច្ចេកទេសរបស់ក្រសួងត្រូវតែធ្វើការដោយផ្ដោតលើគុណភាពជាចម្បង ពោលគឺត្រូវតាមដានគុណភាពសាងសង់តាំងពីចាប់ផ្ដើមបើកការដ្ឋានសាងសង់ រហូតដល់ការប្រគល់ទទួល។

ឆ្លៀតក្នុងឱកាសនោះ ឯកឧត្ដមទេសរដ្ឋមន្ត្រី ក៏បានស្នើឱ្យបងប្អូនប្រជាពលរដ្ឋដែលធ្វើដំណើរតាមផ្លូវនោះ ជាពិសេសបងប្អូនដែលរស់នៅតាមបណ្ដោយផ្លូវជាតិលេខ២ និងផ្លូវជាតិលេខ២២ មានការអត់ធ្មត់ ចូលរួមសហការ និងប្រុងប្រយ័ត្នខ្ពស់ ពិសេសបើកបរដោយគោរពច្បាប់ចរាចរណ៍ និងយោគយល់គ្នា ព្រោះថាខណ:ពេលកំពុងសាងសង់ វានឹងបង្កឱ្យមានការរំខានខ្លះៗដល់ការរស់នៅ ការប្រកបរបរចិញ្ចឹមជីវិត ការធ្វើដំណើររបស់បងប្អូនប្រជាពលរដ្ឋ៕

 

មតិយោបល់