ផ្ទះ ព័ត៌មានជាតិ ខឹងបើកខារ៉ាអូ...

ខឹងបើកខារ៉ាអូខេច្រៀងឮពេក ប្រាប់មិនស្ដាប់ ក៏កើតជាហិង្សា អ្នកចាញ់ដេកពេទ្យ ឯឈ្នះចូលប៉ុស្តិ៍

0

កណ្តាល: កាលពីវេលាម៉ោង ១២ និង០០នាទីកណ្ដាលអធ្រាត្រ ឈានចូលថ្ងៃទី០៩ ខែកក្កដា ឆ្នាំ២០១៩ មានករណីហិង្សាដោយចេតនា នៅចំណុចភូមិកណ្ដាលកោះ ឃុំកោះឧកញ៉ាតី ស្រុកខ្សាច់ កណ្ដាល ខេត្តកណ្ដាល។

ជនរងគ្រោះឈ្មោះ ហ៊ិន គីម ភេទប្រុស អាយុ៤២ឆ្នាំ ជនជាតិខ្មែរ មុខរបរ កម្មករសំណង់ មានទីលំនៅភូមិ ចុងកោះ ឃុំកោះឧកញ៉ាតី ស្រុកខ្សាច់កណ្ដាល ខេត្តកណ្ដាល មានរបួសក្បាលផ្នែកខាងមុខ លើផ្ទៃមុខ និងបបូរមាត់ ។

ជនសង្ស័យ (ឃាត់ខ្លួន) ឈ្មោះ រិន សុវណ្ណ ហៅ ណយ ភេទប្រុស អាយុ៣៩ឆ្នាំ ជនជាតិខ្មែរ មានទីលំនៅភូមិ ចុងកោះ ឃុំកោះឧកញ៉ាតី ស្រុកខ្សាច់កណ្ដាល ខេត្តកណ្ដាល មុខរបរជាងសំណង់
(ត្រូវជាប្អូនថ្លៃ ជនរងគ្រោះ) ។

វត្ថុតាងចាប់យក៖ ដំបងឈើចំនួន២កំណាត់ ។

ដំណើររឿង៖ នៅថ្ងៃទី០៨ ខែកក្កដា ឆ្នាំ២០១៩ វេលាម៉ោង៨ និង០០នាទីព្រឹក ជនរងគ្រោះ និងជនសង្ស័យ ព្រមទាំងមនុស្សជាច្រើននាក់ទៀត បានទិញស្រាបៀរ និងស្រាថ្នាំមកផឹក នៅកន្លែងរោងលក់គ្រឿងសង្ហារឹមរបស់ឈ្មោះ រិន សុវណ្ណ និងមានដាក់ខារ៉ាអូខេ ច្រៀងលេង ។

លុះដល់វេលាម៉ោងកើតហេតុ ជនរងគ្រោះ បានបើកសំទ្បេងខារ៉ាអូខេច្រៀងឮខ្លាំង ពេលនោះជនសង្ស័យ ប្រាប់កុំឲ្យបើកឮពេកអ្នកជិតខាងគេដេក តែជនរងគ្រោះ មិនស្តាប់ក៏មានទំនាស់ពាក្យសម្ដីគ្នា បន្តិចក្រោយមកជនសង្ស័យ បានដាល់ត្រូវមុខជនរងគ្រោះមួយដៃ បណ្ដាលឲ្យជនរងគ្រោះដួលផ្ងារក្រោយ ហើយជនសង្ស័យបានយកដំបងមែកស្វាយពីក្រោយរោង មកវាយលើក្បាលជនរងគ្រោះជាច្រើន បណ្ដាលឲ្យមានរបួសស្នាម និងសន្លប់បាត់ស្មារតី ហើយដំបងបានបាក់ជាពីរជាកំណាត់ ឃើញដូចនោះឈ្មោះ អាត ខេង និងមនុស្សជាច្រើននាក់ទៀត បានចូលមកឃាត់ជនសង្ស័យ ។

បន្ទាប់ក្រុមគ្រួសារជនរងគ្រោះ បានបញ្ជូនជនរងគ្រោះទៅមន្ទីរពេទ្យកាលម៉ែត្រ ចំណែកជនសង្ស័យ ត្រូវបានសមត្ថកិច្ចនគរបាលប៉ុស្តិ៍កោះឧកញ៉ាតី ចុះអន្តរាគមន៍ឃាត់ខ្លួន រួចបញ្ជូនមកអធិការដ្ឋាននគរបាលស្រុក ចាត់ការបន្តតាមនីតិវិធី៕

មតិយោបល់

Loading...