កំពង់ស្ពឺៈ យោងតាមផេកនគរបាលជាតិ បានឲ្យដឹងថា មនុស្សចំនួន២៧នាក់ រងរបួសធ្ងន់ស្រាល ករណីគ្រោះថ្នាក់ចរាចរណ៍ រថយន្តដាច់ហ្វ្រាំងក្រឡាប់ខ្លួនឯង នៅចំណុចផ្លូវចូលប្រាសាទមាសប្រាសាទប្រាក់ ស្ថិតនៅក្នុងភូមិស្រង់ ឃុំស្រង់។
ឧបទ្ទវហេតុខាងលើ កើតឡើងនៅថ្ងៃអាទិត្យ ១៣កើត ខែអាសាឍ ឆ្នាំកុរ ឯកស័កពុទ្ធ ព.ស២៥៥៣ ត្រូវនឹងថ្ងៃទី១៤ ខែកក្កដា ឆ្នាំ២០១៩ វេលាម៉ោង១៥និង៣០នាទី។
មន្ត្រីនគរបាលដដែលបន្តថា រថយន្តបង្កម៉ាក ហ៊ីយ៉ាន់ដាយ ពណ៌ស ពាក់ស្លាកលេខ តាកែវ 3A-3441 បើកបរដោយឈ្មោះ ឯម សល ភេទប្រុស អាយុ៣២ឆ្នាំ នៅភូមិអង្គរាំង ឃុំត្រាញ់ខាងជើង ស្រុកសំរោង ខេត្តតាកែវ។
មន្ត្រីនគរបាលចរាចរណ៍ខេត្តកំពង់ស្ពឺ បានបញ្ជាក់ថា ក្នុងហេតុការណ៍គ្រោះថ្នាក់នោះបណ្តាលឲ្យរបួសមនុស្ស២៧នាក់ (ស្រី២០នាក់) របួសធ្ងន់១៤នាក់ (ស្រី ១២នាក់, ស្រាល ១៣នាក់, ស្រី ០៨នាក់)។
ក្រោយកើតហេតុសមត្ថកិច្ចមូលរដ្ឋាន សហការជាមួយកម្លាំងជំនាញបានបញ្ជូនជនរងគ្រោះទៅសម្រាកព្យាបាល និងវាសវែងយកមធ្យោបាយពាក់ព័ន្ធមករក្សារទុកនៅអធិការស្រុក ដើម្បីដោះស្រាយតាមនីតិវិធី ៕
មតិយោបល់