ភ្នំពេញៈ យុវជនម្នាក់ក្នុងចំណោមបក្ខពួក២នាក់ ត្រូវកម្លាំងកងរាជអាវុធហត្ថឃាត់ខ្លួន បន្ទាប់ពីពួកគេបានធ្វើសកម្មភាពឆក់ទូរស័ព្ទដៃពីជនរងគ្រោះបានសម្រេច ក៏ត្រូវកម្លាំងល្បាតដេញចាប់បានកាលពីនៅវេលាម៉ោង១០និង១០នាទីយប់ថ្ងៃទី១៧ ខែកក្កដា ឆ្នាំ២០១៦ នៅចំណុចផ្លូវ១៤៨ កែងនរោត្តម សង្កាត់ផ្សារកណ្តាលទី១ ខណ្ឌដូនពេញ ។

ប្រភពព័ត៌មាននៅកន្លែងកើតហេតុបានឲ្យដឹងថា ជនសង្ស័យឈ្មោះ រ៉ាត់ ភេទប្រុស អាយុ១៨ឆ្នាំ ស្នាក់នៅទីកន្លែងមិនពិតប្រាកដ។ ចំណែកឯបក្ខពួកម្នាក់ទៀត ដែលរត់គេចខ្លួនបាត់នោះមិនស្គាល់ឈ្មោះ។

ប្រភពដដែលបានបន្តទៀតថា នៅមុនពេលកើតហេតុជនរងគ្រោះបានជិះម៉ូតូមួយគ្រឿងចេញពីដើរលេងនៅកោះពេជ្រ លុះធ្វើដំណើរមកដល់ចំណុចខាងលើ បានលើទូរស័ព្ទមកនិយាយ ភ្លាមនោះស្រាប់តែជនសង្ស័យ២នាក់នោះ បានជិះម៉ូតូមួយគ្រឿងម៉ាកហុងដាវ៉ែវអ៊ី ពណ៌ស ពាក់ស្លាកលេខភ្នំពេញ 1AF-6663 មកពីក្រោយរួចធ្វើសកម្មភាពឆក់ទូរស័ព្ទ ដៃបានសម្រេច ហើយព្យាយាមបើកម៉ូតូរត់គេចខ្លួន តែត្រូវជនរងគ្រោះដេញតាម និងស្រែកឆោឡោក៏ត្រូវកម្លាំងល្បាតរបស់អាវុធហត្ថដែលនៅក្បែរនោះ ដេញចាប់ប្រផាប់ប្រភីង រហូតឃាត់ខ្លួនបានម្នាក់ ហើយប្រជាពលរដ្ឋព្រួតគ្នាវាយម្នាក់មួយដៃមួយជើងទ្រមខ្លួន ចំណែកឯងបក្ខពួកវាបានយកទូរស័ព្ទដៃ របស់ជនរងគ្រោះរត់គេចខ្លួនតាមបណ្តោយផ្លូវលេខ១៥ សង្កាត់ផ្សារកណ្តាលទី១ បាត់ស្រមោលតែម្តង។

បច្ចុប្បន្នជនសង្ស័យបានបញ្ជូនទៅទីបញ្ជាការអាវុធហត្ថរាជធានី ដើម្បីចាត់ការបន្តទៀត៕