ភ្នំពេញ: ខ្ញុំជាយុវជនគំរូកម្ពុជា លើកទី៦ ពានរង្វាន់ធំប្រចាំឆមាស គឺម៉ូតូមួយគ្រឿងម៉ាក ហ៊្សុយស៊ូគី ដែលសម្ដេចតេជោ ហ៊ុន សែន នឹងផ្ដល់កិត្តិយសប្រគល់ពានរង្វាន់ដោយផ្ទាល់តែម្ដង។ កម្មវិធីនេះ ចាប់ផ្តើមទទួលពាក្យប្រកួតប្រជែង ចាប់ពីថ្ងៃទី១៨ ខែកក្កដា រហូតដល់ថ្ងៃទី២៣ ខែកក្កដា ឆ្នាំ២០១៦ ហើយឈប់ទទួលពាក្យនៅម៉ោង៦៖០០នាទីល្ងាច។ នេះជាការផ្សាយពីហ្វេសប៊ុកផ្លូវការរបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅមុននេះបន្តិច។

ហ្វេសប៊ុកសម្ដេច បន្តឲ្យដឹងថា បេក្ខជន បេក្ខនារី អាចចូលរួមដាក់ពាក្យប្រកួតប្រជែងក្នុងកម្មវិធី «ខ្ញុំជាយុវជនគំរូកម្ពុជា» លើកទី៦ – I Am a Role Model 6 ដើម្បីបង្ហាញពីទង្វើសកម្មភាពជួយដល់សង្គមដែលជាគំរូល្អៗ សម្រាប់យុវជន និងប្រជាពលរដ្ឋទូទៅ។ កម្មវិធី «ខ្ញុំជាយុវជនគំរូកម្ពុជា» ត្រូវបានបង្កើតឡើងក្រោមគំនិតផ្តួចផ្ដើមដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងគោលបំណងគាំទ្រ លើកទឹកចិត្តដល់ពលរដ្ឋ ជាពិសេសយុវជនយុវនារីគ្រប់រូបឲ្យចូលរួមកសាងអំពើល្អក្នុងសង្គម និងចៀសឆ្ងាយពីគ្រឿងញៀន និងអំពើអបាយមុខផ្សេងៗ។

លក្ខ័ណចូលរួម បេក្ខជន បេក្ខនារី ដែលអាចដាក់ពាក្យចូលរួមប្រកួតប្រជែងបាន គឺត្រូវតែជាបេក្ខជនបេក្ខនារី ដែលធ្លាប់បានធ្វើ/កសាងអំពីល្អក្នុងសង្គមរួចហើយ និងកំពុងបន្តធ្វើអំពីគំរូល្អៗជាច្រើនទៀត នៅក្នុងសង្គមជាតិ។ សូម Upload វីដេអូឃ្លីប (Video Clip) ដែលបង្ហាញអំពីសកម្មភាពនៃអំពើល្អទាំងនោះទៅក្នុង Facebook ផ្ទាល់ខ្លួន ហើយផ្ញើកូដ (Submit Embed Code) នៃ Video នោះមកកាន់គេហទំព័រសម្តេចតេជោ ដើម្បីចូលរួមប្រកួត។ ចំពោះអតីតជ័យលាភី Top1, Top10 ចាប់តាំងពីវគ្គ១ ដល់វគ្គ៥ គឺអាចចូលរួមប្រកួតបានទាំងអស់គ្នា។

សម្តេចតេជោ ហ៊ុន សែន នឹងផ្តល់កិត្តិយសប្រគល់ពានរង្វាន់ដល់បេក្ខជនបេក្ខនារីជ័យលាភីទាំងអស់ ដែលបានទទួលជ័យជំន:នៅក្នុងវគ្គពិសេសនេះ។ ជ័យលាភីលេខ១ (Top-1) វគ្គទី៦នេះ នឹងទទួលបានរង្វាន់ធំម៉ូតូ ZUSUKI IMPLUSE មួយគ្រឿង និងរង្វាន់ផ្សេងៗជាច្រើនទៀត។

កម្មវិធីនេះ គឺចាប់ផ្តើមទទួលពាក្យប្រកួតប្រជែង ចាប់ពីថ្ងៃទី១៨ ខែកក្កដា រហូតដល់ ថ្ងៃទី២៣ ខែកក្កដា ឆ្នាំ២០១៦ ឈប់ទទួលពាក្យនៅម៉ោង៦៖០០នាទីល្ងាច។ សូមចុចអានការណែនាំបន្ថែមក្នុងកម្មវិធី ខ្ញុំជាយុវជនគំរូកម្ពុជា នៅវេបសាយសម្តេចតេជោ www.samdechhunsen.gov.kh ឬ ចុះឈ្មោះចូលរួម //spm.samdechhunsen.gov.kh/login.php៕