Post News Media ព័ត៌មានជាតិ ជម្លោះបែកផ្សែ...

ជម្លោះបែកផ្សែង! ខឹងស៊ីផ្លេមិនជៀស ចុះវាយអ្នកបើកម៉ូតូ ផ្អើលសមមត្ថចុះអន្តរាគមន៍

ភ្នំពេញ: ទំនាស់ពាក្យសម្តីដាក់គ្នា ឈានរហូតដល់ប្រើអំពើហិង្សា រវាងភាគីខាងអ្នកបើកបររថយន្ត និងភាគីខាងម៉ូតូ បង្កឲ្យមានការភ្ញាក់ផ្អើល កាលពីវេលាម៉ោង ៩និង១០នាទីយប់ថ្ងៃទី២០ ខែកក្កដា ឆ្នាំ២០១៩ ស្ថិតនៅលើផ្លូវ២០១១ កែងផ្លូវសហព័ន្ធរុស្សី ភូមិតាងួន សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។

ភាគីខាងរថយន្តមួយគ្រឿងម៉ាកលុចស៊ីស RX330 ពណ៌ស ពាក់ស្លាកលេខ ភ្នំពេញ2BB-0023 អ្នកបើកបរមិនស្គាល់អត្តសញ្ញាណ។ ចំណែកភាគីខាងម៉ូតូ ១គ្រឿងធុនសេ១២៥ ជិះគ្នា៣នាក់ ប្តីប្រពន្ធ និងកូនមិនស្គាល់អត្តសញ្ញាណដូចគ្នា។

តាមប្រភពព័ត៌មាននៅកន្លែងកើតហេតុ បានឲ្យដឹងថា មុនពេលកើតហេតុគេឃើញភាគីខាង រថយន្តលុចស៊ីស RX330 បានធ្វើដំណើរតាមផ្លូវសហព័ន្ធរុស្ស៊ី ក្នុងទិសដៅពីលិចទៅកើត លុះមកដល់ផ្លូវកែង បានបត់ឆ្វេងមកផ្លូវ ២០១១វិញ ស្រាប់តែមានបុរសម្នាក់ បើកបរម៉ូតូមួយគ្រឿង រួមដំណើរជាមួយប្រពន្ធ និងកូនអាយុប្រហែល៣ឆ្នាំ ធ្វើដំណើរតាមផ្លូវ២០១១ ក្នុងទិសដៅពីជើងទៅត្បូង ខណ:មកដល់ផ្លូវ កែងបានឈប់ចាំស្តុប។

តាមប្រភពដដែលបានបន្តថា ពេលនោះភាគីខាងអ្នកបើកបររថយន្ត បត់ឆ្វេងមកឃើញភាគីខាងម៉ូតូឈប់ ធ្វើឲ្យភាគីខាងរថយន្តពិបាក ក្នុងការបត់ក៏ចុចស៊ីផ្លេ ដើម្បីឲ្យភាគីខាងម៉ូតូចៀស ហើយពេលនោះ ទាំងរថយន្ត និងម៉ូតូមិនមានប៉ះពារគ្នាទេ ស្រាប់តែកើតទំនាស់ពាក្យសម្តីគ្នា រហូតឈានដល់ភាគី ខាងអ្នកបើកបររថយន្ត ចុះមកវាយភាគីខាង អ្នកបើកបរម៉ូតូមួយដៃ ក្លាយជាទំនាស់ឈ្លោះប្រកែកគ្នា ផ្អើលដល់សមត្ថកិច្ច ចុះមកអន្តរាគមន៍ដោយនាំភាគីទាំង២ ទៅធ្វើការសាកសួរនៅប៉ុស្តិ៍កាកាប ចុងក្រោយភាគីសងខាងបានសម្រួលគ្នា ដើម្បីបញ្ចប់រឿងនៅប៉ុស្តិ៍៕