កណ្ដាលៈ លោកយាយម្នាក់បានសសម្រេចធ្វើអត្តឃាតចងកសម្លាប់ខ្លួនកាលពីវេលាម៉ោងប្រហែល០៩ព្រឹកថ្ងៃទី១៨ ខែកក្កដា ឆ្នាំ២០១៦ នៅចំណុចក្នុងព្រៃខាងជើងភូមិត្រពាំងអណ្តូង ឃុំសំរោងលើ ស្រុកអង្គស្នួល ខេត្តកណ្តាល។

លោកយាយដែលធ្វើអត្តឃាតឈ្មោះ យ៉ាន់ រឿន អាយុ៧០ឆ្នាំ ជនជាតិខ្មែរ មុខរបរកសិករ រស់នៅភូមិឃុំកើតហេតុ។

ប្រភពពីសាច់ញាតិបានឲ្យដឹងថា នៅមុនពេលកើតហេតុប្រហែល១ខែមុន លោកយាយរងគ្រោះធ្លាប់ជួបគ្រោះថ្នាក់ ដោយសារដើមឈើរលំត្រូវក្បាលរបួសធ្ងន់ ហើយត្រូវបានក្រុមគ្រួសារយកទៅព្យាល និងកំពុងបន្តព្យាបាលមកដល់សព្វថ្ងៃ។ លុះដល់ថ្ងៃកើតហេតុ វេលាម៉ោងប្រហែល០៨និង៣០នាទីព្រឹក លោកយាយបានដើរបាត់ចេញពីផ្ទះ ភ្លាមៗនោះដែរក្រុមគ្រួសារបាននាំគ្នាដើររកដល់ម៉ោង១២និង៣០នាទី ស្រាប់តែប្រទះឃើញលោកយាយចងក ដោយក្រម៉ាទៅនិងដើមស្នាយស្លាប់បាត់ទៅហើយ រួចផ្អើលឆោឡោនាំគ្នាស្រាយទម្លាក់ចុះក្រោម ហើយរាយការណ៍ដល់សមត្ថកិច្ច។

ឆ្លងតាមការធ្វើកោសល្យវិច័យរបស់នគរបាលបច្ចេកទេសស្រុក មានការចូលរួមពីលោកគ្រួពេទ្យឃុំ ក្រុមប្រឹក្សាឃុំ មេភូមិ នគរបាលប៉ុស្តិ៍ ឃើញថា លោកយាយពិតជាបានធ្វើអត្តឃាតចងកសម្លាប់ខ្លួនពិតប្រាកដមែន។ ចំពោះសពលោកយាយត្រូវបានប្រគល់ជូនក្រុម គ្រួសារយកទៅធ្វើបុណ្យតាមប្រពៃណី៕