Post News Media ព័ត៌មានជាតិ ជួលបន្ទប់ស្នា...

ជួលបន្ទប់ស្នាក់នៅទើបបាន៤ថ្ងៃ សង្សារអត់សំចៃដៃវាយនាងប៉ោងភ្នែក

ភ្នំពេញ: នារីវ័យក្មេងម្នាក់រត់ទៅប្តឹងប៉ូលិស បន្ទាប់ពីបុរសជាគូរសង្សារបានប្រើអំពើហិង្សា ជាញឹកញាប់ លើកចុងក្រោយ នៅព្រឹកថ្ងៃទី៣០ ខែកក្កដា ឆ្នាំ២០១៩នេះ វេលាម៉ោង ៦និង៣០នាទីព្រឹក រៀបនឹងចេញទៅធ្វើការងារហើយ ស្រាប់តែសង្សារផ្ទុះកំហឹងរឿងបញ្ជាឲ្យនាងដើររកខ្ចីចងការលុយគេ មិនបាន ប្រើកណ្តាប់ដៃវាយជាំភ្នែកម្ខាង ធាក់ចង់បាក់ចង្កេះ និងយកខ្សែរឹតក ស្ទើរក្ស័យបង្ខាំងចាក់សោក្នុងបន្ទប់ រត់គេចរួចទៅប្តឹងប៉ូលិសចាប់ខ្លួនចូលប៉ុស្តិ៍ បន្ទប់ជួល ភូមិកម្រៀង សង្កាត់កន្ទោក ខណ្ឌកំបូល រាជធានីភ្នំពេញ។

នារីរងគ្រោះឈ្មោះ សេង សម្ភស្ស អាយុ ២៦ឆ្នាំ មុខរបរ កម្មការនីរោងចក្រ ស្នាក់នៅបន្ទប់ជួលកន្លែងកើតហេតុបាន៤ថ្ងៃហើយ មានទីលំនៅភូមិព្រៃក្រាយ សង្កាត់ស្នោ ខណ្ឌកំបូល រាជធានីភ្នំពេញ។
បុរសជាគូរសង្សារឈ្មោះ ប៉េង វិច្ឆិកា អាយុ ៣០ឆ្នាំ មុខរបរ មិនពិតប្រាកដ មានទីលំនៅភូមិកន្ទោកជើង សង្កាត់កន្ទោក ។

តាមសម្តីភាគីខាងស្រីបានឲ្យដឹងថា នាងបានស្រឡាញ់គ្នាជាមួយបុរសខាងលើ អស់រយ:ពេល៤ខែមកហើយ និងចំនួន៤លើកដែល សង្សារប្រើអំពើហិង្សាទាំងលើកនេះ ទ្រាំលែងបានប្តឹងប៉ូលិសចាប់ខ្លួនតែម្តង ។ នារីរងគ្រោះបានឲ្យដឹងទៀតថា តាមអ្វីដែលគូរសង្សារសន្យាជាមួយនាងនោះ គឺរៀបការនឹងក្លាយជាប្តីប្រពន្ធស្របច្បាប់ ដោយសារការទំនុកចិត្តនាងបានរួមរស់ស្នាក់នៅជាមួយគ្នា ដូចជាប្តីប្រពន្ធអ៊ីញ្ចឹង ទាំងមិនបានរៀបការ ទន្ទឹងការសន្យា ខាងប្រុសចេះតែអូសបន្លាយ លើកពេល លើកថ្ងៃរហូត ដល់នាងទ្រាំលែងបាន នូវអ្វីដែលជ្រុលជ្រួស ព្រោះអង្កក្លាយជាបាយទៅហើយ ដើម្បីឲ្យទុកចិត្តគ្នានាងបបួលនាំទៅចុះ ធ្វើលិខិតអាពាហ៍ពិពាហ៍ មង្គលការចាំពេលក្រោយក៏បាន តែខាងប្រុសចេះតែប្រកែក រកាំរកុសក្នុងសម្ព័ន្ធភាពស្នេហា ហិង្សាកើតមានញឹកញាប់ ឈ្លោះ ត្រូវ ស្មើគ្នា រយ:ពេល៤ថ្ងៃចុងក្រោយមុនប្តឹង នាំគ្នាទៅជួលបន្ទប់ស្នាក់នៅក្នុងភូមិកម្រៀង សង្កាត់កន្ទោក ។ ដល់ចំណុចនេះ នារីរងគ្រោះទួចទ្រហោយំ ស្រណោះខ្លួន មិនគួរឡើយណាស្នេហា អភ័ព្វ ជាំដិតដាមរាងកាយ ដោយអំពើហិង្សារបស់សង្សារទៅវិញ ព្រោះតែខឹងប្រើនាងដើរឲ្យរកបុល ខ្ចីលុយគេមិនបាន នៅព្រឹកថ្ងៃទី៣០នេះ ស្លៀកពាក់រៀបនឹងចេញទៅធ្វើការទៅហើយ បុរសជាសង្សារ ផ្ទុះកំហឹងខឹងប្រើកណ្តាប់ដៃ វាយជាំភ្នែកឆ្វេង ធាក់សឹងបាក់ចង្កេះ យកខ្សែភ្លើងឆ្នាំងបាយចងរឹតក ស្ទើក្ស័យជីវិត ចាក់សោបង្ខាំងក្នុងបន្ទប់ ទម្រាំរើរួចរត់ទៅប្តឹងប៉ូលិសចុះទៅ អន្តរាគមន៍ ចាប់ឃាត់ខ្លួនជនសង្ស័យតែម្តង នាំទៅប៉ុស្តិ៍កន្ទោក ក្នុងជំហរមួយ ឲ្យចាត់ការតាមផ្លូវច្បាប់៕

រីឯបុរសជាសង្សារវិញ បានឲ្យដឹងថា មកពីខ្លួនខឹងពេក នាងជាសង្សារ គាស់ទ្វារបន្ទប់ជួល លួចយកឯកសារ សៀវភៅគ្រួសារ សំបុត្រកំណើត របស់គ្រួសារខ្លួនយកទៅបាត់ និងបង្ខំឲ្យ ចុះលិខិតរៀបអាពាហ៍ពិពាហ៍ ខណ:ដែលខ្លួនមិនទាន់មានលទ្ធភាព ទើបទ្រាំងលែងបាន វាយជ្រុលដៃ ប៉ោងភ្នែកនាងតែម្តង ។ ហើយបុរសខាងលើ ក៏ទទួលនូវទង្វើរបស់ខ្លួនដែរ ពិតជាបានវាយនាងមែន ដោយសារខឹងពេក ទ្រាំលែងបាន ។

ដោយឡែក សមត្ថកិច្ចនគរបាលប៉ុស្តិ៍កន្ទោកបានឲ្យដឹងថា ករណីខាងលើ ក្រោយពីទទួលបណ្តឹងរបស់នារីរងគ្រោះភ្លាម កម្លាំងប៉ុស្តិ៍ចុះទៅឃាត់នាំខ្លួនជនសង្ស័យភ្លាមៗផងដែរ និងអនុវត្តន៍បន្តតាមនីតិវិធី ៕