ភ្នំពេញ: កម្លាំងនគរបាលខណ្ឌចំការមនផ្ទុះអាវុធ២គ្រាប់ តាមចាប់មុខសញ្ញាលួចកង់រថយន្តនៅពេលយប់ ឃាត់ខ្លួនជនសង្ស័យបានម្នាក់ និង៣នាក់ទៀតរត់គេចខ្លួនព្រលឹងចុងសក់ កាលពីវេលា១២និង៤០នាទីយប់រំលងអាធ្រាត្រឈានចូលថ្ងៃទី២០ ខែកក្កដា ឆ្នាំ២០១៦ តាមបណ្ដោយផ្លូវ ២១៧ ជិតផ្សារដើមគរ សង្កាត់ទួលស្វាយព្រៃ២ ខណ្ឌចំការមន។
ប្រភពឲ្យដឹងថា ជនសង្ស័យខាងលើឈ្មោះ ឯក សុធា អាយុ៣២ឆ្នាំ មានទីលំនៅនិងមុខរបរមិនច្បាស់លាស់ ។
យោងទៅតាមសំដីសាក្សីដែលឃើញហេតុការណ៍ខាងលើបានឲ្យដឹងថា មុនពេលកើតហេតុ គាត់ឃើញជនសង្ស័យចំនួន៤ នាក់ បានកំពុងធ្វើសកម្មភាព លួចកង់រថយន្ដ រួចម្ចាស់កង់ឡានជាជនរងគ្រោះក៏បានស្រែកថា ចោរៗ រួចក៏មានជន៣នាក់ ពាក់សំលៀកបំពាក់ ស៊ីវិល បានជិះម៉ូតូដេញតាមទាញកាំភ្លើងបាញ់ចំនួន២គ្រាប់ ផ្អើលប្រជាពលរដ្ឋដែលនៅកន្លែងកើតហេតុខាងលើ ដេញចាប់ជនសង្ស័យបានម្នាក់ក្នុងចំណោម៤នាក់ រួចក៏នាំគ្នាស្វាគមន៍មួយដៃមួយជើង រងរបួសយ៉ាងដំណុំ ទើបប្រគល់ឲ្យសមត្ថកិច្ច។
ក្រោយពេលកើតហេតុ សមត្ថកិច្ចប៉ុស្តិ៍រដ្ឋបាលទួលស្វាយព្រៃ២ បានឃាត់ខ្លួនជនសង្ស័យខាងលើ យកទៅសាកសួរបន្ត ដើម្បីចាត់ការទៅតាមផ្លូវច្បាប់៕
មតិយោបល់