ផ្ទះ ព័ត៌មានជាតិ មេការសំណង់ជនជ...

មេការសំណង់ជនជាតិចិនម្នាក់ ដេកស្លាប់ក្នុងបន្ទប់

0

កណ្ដាល: យោងតាមផេកការិយាល័យផ្សព្វផ្សាយតាមបណ្តាញសង្គម បានឲ្យដឹងថា ជនជាតិចិនម្នាក់ ដេកស្លាប់ក្នុងបន្ទប់របស់ខ្លួន យ៉ាងអាណោចអាធ័ម ក្នុងការដ្ឋានសំណង់មួយកន្លែង ដោយសង្ស័យថា ការស្លាប់នេះ បណ្ដាលមកពីខ្យល់គ។ ករណីនេះ បង្កការភ្ញាក់ផ្អើលឡើងនៅវេលាម៉ោង៩ និង១០នាទី ថ្ងៃទី១៤ ខែសីហា ឆ្នាំ២០១៩ ស្ថិតក្នុងភូមិព្រែកស៊ឹង ឃុំសំពៅពូន ស្រុកកោះធំ ខេត្តកណ្តាល ។

មន្រ្ដីនគរបាលផ្នែកកោសល្យវិច័យស្រុកកោះធំ បានឲ្យដឹងថា ជនរងគ្រោះ ឈ្មោះ ជូ យ៉ាវលីន (ZHU YAOLIN ) ភេទប្រុស កើតថ្ងៃទី១៨ ខែ១១ ឆ្នាំ១៩៦៦ ជនជាតិចិន មុខរបរ មេការសំណង់ចិន មានកាន់លិខិតឆ្លងដែន លេខ ED6230664 ចុះថ្ងៃទី១៦ ខែសីហា ឆ្នាំ២០១៨ មានស្រុកកំណើតនៅខេត្តជាំងស៊ូ ប្រទេសចិន ។ បច្ចុប្បន្នស្នាក់នៅ ភូមិព្រែកស៊ឹង ឃុំសំពៅពូន ស្រុកកោះធំ ខេត្តកណ្តាល ។

ប្រភពដដែលបន្ដថា តាមការបំភ្លឺរបស់ឈ្មោះ វ័ង ជុនគឺ ភេទប្រុស អាយុ៥១ឆ្នាំ ជាជនជាតិចិន មុខរបរកម្មករសំណង់ ស្នាក់នៅការដ្ឋានសំណង់ជាមួយគ្នា បានប្រាប់សមត្ថកិច្ចថា៖ កាលពីថ្ងៃទី១៣ ខែសីហា ឆ្នាំ ២០១៩ វេលាម៉ោង១៩ ជនរងគ្រោះមានសភាពស្រវឹងស្រា និងអាការ:មិនស្រួលខ្លួន ងងឹតមុខ ហើយឈប់ម៉ូតូដួល ដោយឃើញសភាពបែបនោះ រូបគាត់ក៏នាំជនរងគ្រោះ ទៅមន្ទីពេទ្យឯកជនចិនមួយកន្លែង នៅភូមិជ្រៃធំ ឃុំសំពៅពូន ដើម្បីព្យាបាល ។ បន្ទាប់ពីព្យាបាលសុខភាពបានស្រួលបួលវិញហើយ រូបគាត់ ក៏នាំជនរងគ្រោះយកមកបន្ទប់ស្នាក់នៅរបស់ខ្លួនវិញ ដោយសម្រាកជាមួយគ្នា រហូតទល់ភ្លឺ រូបគាត់បានភ្ញាក់ពីដេកវិញ ហើយឃើញជនរងគ្រោះពុំទាន់ភ្ញាក់ ក៏ទៅដាស់ តែជនរងគ្រោះ បានស្លាប់បាត់ទៅហើយ ក៏បានបង្កឲ្យមានផ្អើលឆោឡោ រួចក៏រាយការណ៍ជូនសមត្ថកិច្ចនគរបាលប៉ុស្ដិ៍ រដ្ឋបាលសំពៅពូន ដើម្បីធ្វើការពិនិត្យ ។

បន្ទាប់ពីនគរបាលប៉ុស្ដិ៍សំពៅពូនទទួលបានព័ត៌មានខាងលើ ភ្លាមនោះក៏បន្ដរាយការណ៍ ទៅកម្លាំងនគរបាលជំនាញស្រុក និងបន្ដរាយការណ៍ទៅកម្លាំងនគរបាលការិយាល័យ ជំនាញបច្ចេកទេសវិទ្យាសាស្រ្តខេត្ត ដោយសហការជាមួយ អាជ្ញាធរមូលដ្ឋាន ,គ្រូពេទ្យផ្នែកជំនាញ និងតំណាងក្រុមហ៊ុនសំណង់ ដោយបញ្ជាក់ថា ជនរងគ្រោះស្លាប់ដោយសារខ្យល់គពិតប្រាកដមែន ។

ក្រោយពីពិនិត្យចប់សព្វគ្រប់ សាកសពជនរងគ្រោះ ត្រូវបានដឹកទៅរក្សាទុកនៅវត្តស្ទឹងមានជ័យ រាជធានីភ្នំពេញ ដើម្បីរង់ចាំសាច់ញាតិយកទៅចាត់ចែងធ្វើបុណ្យតាមប្រពៃណី ៕

មតិយោបល់

Loading...