ផ្ទះ ព័ត៌មានជាតិ នារីរូបស្រស់ព...

នារីរូបស្រស់ពីរ២នាក់ បើកលុចស៊ីស បុករបាំងថ្មពុះចែកទ្រូងផ្លូវ កល់ជាប់ទៅមុខលែងរួច បណ្ដាលឲ្យរងការខូចខាត

0

ភ្នំពេញ: នារីរូបស្រស់ពីរ២នាក់ បើករថយន្តលុចស៊ីស RX330មួយគ្រឿង បោះពួយយ៉ាងលឿន ក៏រេចង្កូតទៅបុករបាំងថ្មពុះចែកទ្រូងផ្លូវពេញទំហឹង កាលពីវេលាម៉ោង ១២និង៣០នាទីរំលងអធ្រាត្រ ឈានចូលថ្ងៃទី២៤ ខែសីហា ឆ្នាំ២០១៩ ត្រង់ចំណុចខាងមុខផ្សារដេប៉ូ ស្ថិតតាមបណ្ដោយផ្លូវ២១៥ ក្នុងសង្កាត់ទឹកល្អក់ទី១ ខណ្ឌទួលគោក។

តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញរថយន្តបង្ក ម៉ាកលុចស៊ីស RX330 ពណ៌ប្រផេះ ពាក់ស្លាកលេខ ភ្នំពេញ 2AK-5806 បើកបរដោយនារី ២នាក់ ធ្វើដំណើរពីជើងទៅត្បូង តាមបណ្ដោយផ្លូវ២១៥ ក្នុងល្បឿនយ៉ាងលឿន។
មកដល់ចំណុចកើតហេតុ សង្ស័យអ្នកបើករថយន្តបង្កស្រវឹង បានបើករេចង្កូតមកខាងឆ្វេងដៃ ទៅបុកនិងរបាំងថ្មពុះចែកទ្រូងផ្លូវពេញទំហឹង បណ្ដាលឲ្យរថយន្តឡើង ទៅកល់ជាប់ពីលើរបាំងថ្មពុះចែកទ្រូងផ្លូវ រងការខូចខាតក្រពឹតផ្នែកខាងមុខ ចំណែកឯរបាំងថ្មពុះចែកទ្រូង រងការខូចខាតបែកបាក់អស់ចំនួន២កង់ តែមិនបង្កឲ្យមាននរណាម្នាក់រងរបួសនោះទេ។

ភ្លាមៗនោះអ្នកបើកបររថយន្ត ក៏បានចុះពីលើរថយន្តបង្ក រួចបានឡើងជិះរថយន្តរបស់គ្នីគ្នាមួយគ្រឿងទៀត គេចខ្លួនចេញពីកន្លែងកើតហេតុបាត់ស្រមោល។

ក្រោយកើតហេតុ ក៏មានសមត្ថកិច្ចមូលដ្ឋាន បានចុះមកអន្តរាគមន៍ដល់កន្លែងកើតហេតុ រួចទាក់ទងសមត្ថកិច្ចជំនាញ ឲ្យចុះមកធ្វើការវាស់វែង និងស្ទូចយករថយន្តបង្កទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំម្ចាស់រថយន្តបង្ក ចូលខ្លួនមកធ្វើការដោះស្រាយតាមផ្លូវច្បាប់៕

Loading...

Leave a Reply

This site uses Akismet to reduce spam. Learn how your comment data is processed.