ភ្នំពេញ: បុរសម្នាក់ក្រោយពីខ្ចីម៉ូតូញាតិជិតខាង ទៅរកទិញចេក បែរជាបាត់ខ្លួនអស់មួយយប់មួយថ្ងៃ សាច់ញាតិក្រុមគ្រួសារ នាំគ្នាដើរតាមស្វែងរក ទើបប្រទះឃើញម៉ូតូដួលក្នុងវាលស្រែ សង្ស័យក៏តាមរកមើលជុំវិញ ស្រាប់តែប្រទះឃើញសាកសព អណ្តែតក្នុងទឹកត្រពាំងឈូកទៅវិញ។

ហេតុការណ៍នេះ បង្កឲ្យមានការភ្ញាក់ផ្អើលនាវេលាម៉ោង ៨និង៣០នាទីព្រឹក ថ្ងៃទី០៣ ខែកញ្ញា ឆ្នាំ២០១៩ នៅត្រពាំងឈូក ជាប់ភូមិត្រពាំងជើងស្រុក សង្កាត់ក្រាំងធ្នង់ ខណ្ឌសែនសុខ ។

សពជនរងគ្រោះឈ្មោះ និល វ៉ាន់ ភេទប្រុស អាយុ៤២ឆ្នាំ មុខរបរ កសិករ និងធ្វើសំណង់ មានប្រពន្ឌឈ្មោះ អឿន សារឿន អាយុ៤១ឆ្នាំ មុខរបរ កម្មកររោងចក្រ កូនប្រុស២នាក់ ក្នុងបន្ទុក ។

តាមក្រុមគ្រួសារ បានឲ្យដឹងថា មុនភ្ញាក់ផ្អើល កាលពីវេលាម៉ោង៧និង៣០នាទីព្រឹកថ្ងៃទី០២ ម្សិលមិញ ជនរងគ្រោះបានខ្ចីម៉ូតូអ្នកជិតខាង ម៉ាកហុងដា សេ១២៥ សេរី២០១៥ ពណ៌ខ្មៅ ពាក់ស្លាកលេខ ភ្នំពេញ 1CQ-3698 ដោយប្រាប់ម្តាយថា ទៅរកទិញចេក ហើយក៏ទៅបាត់រហូត ដល់ល្ងាចថ្ងៃដដែលនៅតែមិនឃើញមកផ្ទះ ទើបឆោឡោ តាមស្វែងរកទាំងក្រុមគ្រួសារ ទាំងម្ចាស់ម៉ូតូ បាត់ជនរងគ្រោះ លុះរហូតមកដល់វេលាម៉ោង៨និង៣០នាទីព្រឹក ថ្ងៃទី០៣ ខែកញ្ញា នេះ តាមស្វែងរក ស្រាប់តែឃើញម៉ូតូមួយគ្រឿង ដួលនៅកណ្តាលវាលស្រែ ត្រង់ចំណុចខាងលើ ចូលទៅតាមស្វែងរក ក៏ប្រទះឃើញ ជនរងគ្រោះស្លាប់អណ្តែតទឹកត្រពាំងឈូក ចម្ងាយពីម៉ូតូប្រមាណជាង៣០០ម៉ែត្រ ក៏ផ្អើលឆោឡោ រាយការណ៍ប្រាប់សមត្ថកិច្ច ចុះទៅពិនិត្យមើល មិនទាន់ដឹងថា ជាប់ពាក់ព័ន្ធអំពើឃាតកម្ម ឬ ស្លាប់ដោយលង់ទឹកនោះទេ។

តែទោះជាយ៉ាង សមត្ថកិច្ច ជំនាញក្រុង ខណ្ឌ ចុះទៅស្រង់ឡើងគោក ពិនិត្យកោសល្យវិច័យ និងស្រាវជ្រាវ សាកសពជុំវិញកន្លែងកើតហេតុ ឃើញថា ជនរងគ្រោះ ពេលដែលទៅរកទិញចេក មានអ្នកភូមិ អ្នកស្គាល់ ហៅហូបស្រា រួចជិះម៉ូតូ ចូលទៅចតទុក តាមភ្លឺស្រែ ដើរទៅរកបេះផ្កាឈូក ក៏ខ្យល់គដួលឈ្លក់ទឹកស្លាប់តែម្តង ហើយចំពោះម៉ូតូឃើញដួលនោះ មេឃភ្លៀងដីសើម មួយយប់មួយថ្ងៃទៅហើយ ដួលដោយខ្លួនឯង។

ក្រោយពិនិត្យរួច ក្រុមគ្រួសារ ក៏មិនប្តឹងផ្តល់អ្វី ទើបសមត្ថកិច្ច បានប្រគល់សពឲ្យ យកទៅចាត់ចែងធ្វើបុណ្យ តាមប្រពៃណី៕