ព័ត៌មានជាតិ

សមត្ថកិច្ចខណ្ឌដូនពេញ សង្ស័យស្រវឹងស្រា វាយអ្នករត់កង់បីបែកភ្នែក ចោទថា «ឯងស៊ីប្លេឌឺអញ»

ភ្នំពេញ: នៅវេលាម៉ោង៤ និង១0នាទី រំលងអធ្រាត្រឈានចូល ថ្ងៃទី១៦ ខែកញ្ញា ឆ្នាំ២០១៩ ស្ថិតតាមបណ្ដោយផ្លូវព្រះស៊ីសុវត្តិ ក្បែរហាងស៊ុប (មានមាន) សង្កាត់ស្រះចក ខណ្ឌដូនពេញ រាជធានីភ្នំពេញ បុរសរត់កងបីម្នាក់ ត្រូវបានសមត្ថកិច្ចវាយបែកភ្នែក។

ប្រភពព័ត៌មានពីជនរងគ្រោះ បានឱ្យដឹងថា មុនពេលកើតហេតុគាត់បើកកង់បីឥណ្ឌា ពណ៌ស គ្មានស្លាកលេខ ធ្វើដំណើរពីត្បូងទៅជើងតាមបណ្ដោយផ្លូវខាងលើ មកដល់មុខសាលាចិន បានចុចស៊ីប្លេ ហៅម៉ូយដែលឈរនៅចិញ្ចើមផ្លូវ ស្រាប់តែមានបុរសម្នាក់ស្លៀកពាក់ស៊ីវិល ដែលអះអាងថា ខ្លួនជាសមត្ថកិច្ចប៉ូលិស សង្ស័យថា ស្រវឹងស្រាជោគជាំ បានជិះម៉ូតូម៉ាក Yamaha M slaz ពាក់ស្លាកលេខ ភ្នំពេញ 1HO-9210 បានដេញឃាត់ រួចប្រើប្រាស់អំពើហិង្សា ទៅលើគាត់មួយដៃចំ មុខក្រោមភ្នែកខាងឆ្វេង បណ្ដាលឲ្យប៉ោងហើមខៀវ រត់ឲ្យគេជួយ។

ដោយឡែកបុរសដែលជាសមត្ថកិច្ចរូបនោះ បានដេញវាយថែមមិនទាន់ ក៏ទៅវាយកញ្ចក់ម៉ូតូកង់បី បណ្ដាលឲ្យបែកកញ្ចក់ខាងមុខ ហើយស្រែកថា «ឯងស៊ីប្លេឌឺអញ»។

ខណ:នោះអ្នកសារព័ត៌មានមកដល់ ធ្វើការឡាយផ្ដិតយករូបភាព បុរសដែលជាប៉ូលិសព្រហ្មទណ្ឌខណ្ឌដូនពេញ បែរជាមករករឿងប្រមាថ និងគំរាមពាក្យអសុរសជាច្រើនឲ្យប្រយ័ត្នខ្លួនទៀតផង។

ក្រោយពេលកើតហេតុ សមត្ថកិច្ចនគរបាលបានឲ្យជនបង្ក និងជនរងគ្រោះ ទៅដាក់ពាក្យបណ្ដឹង ដើម្បីចាត់ការតាមនីតិវិធីច្បាប់៕

មតិយោបល់