សៀមរាប: នៅថ្ងៃទី៣០ ខែកញ្ញា ឆ្នាំ២០១៩ វេលាម៉ោង ៦និង១០នាទីព្រឹក ម្ដាយកូន ២នាក់លង់ទឹកស្លាប់ ត្រង់ចំណុចស្រះទឹក ទំហំ ១០×៥ម៉ែត្រ ជម្រៅ ៤ម៉ែត្រ ខាងត្បូងផ្ទះសព ១២០ម៉ែត្រ ស្ថិតភូមិតាហុក ឃុំត្រីញ័រ ស្រុកពួក ខេត្តសៀមរាប។
ជនរងគ្រោះចំនួន ២នាក់រួមមាន៖
១/ឈ្មោះ លុយ កុក ភេទស្រី អាយុ ៣៣ឆ្នាំ មុខរបរកសិករ រស់នៅភូមិ/ឃុំកើតហេតុ។
២/ឈ្មោះ សេត ស៊ីន ភេទប្រុស អាយុ ៨ឆ្នាំ ជាកូនបង្កើតរបស់សព។
បើតាមការអះអាងពីប្អូនថ្លៃជនរងគ្រោះ បានឱ្យដឹងថា៖ ជនរងគ្រោះ មានជំងឺរ៉ាំរ៉ៃ យូរហើយរហូតប៉ះពាល់ដល់ប្រព័ន្ធសសៃប្រាសាទ មានសតិមិនប្រក្រតី ចេះតែខ្លាចនេះខ្លាចនោះ និងធ្លាប់រកចង.កសម្លាប់ខ្លួនម្តងរួចមកហើយ តែត្រូវសាច់ញាតិឃាត់ទាន់។ លុះព្រឹកថ្ងៃកើតហេតុប្អូនថ្លៃ និងជនរងគ្រោះ (សព) ណាត់គ្នាទៅរកបោចល្ពាក់ ខាងលិចភូមិ តែពេលនោះគ្មានម្ហូប គាត់ (ប្អូនថ្លៃ) ក៏ទៅរកទិញក្នុងភូមិ ខណ:មកវិញ មិនឃើញបងថ្លៃ និងកូនពុំដឹងទៅណា។
ក្រោយមកក៏មានអ្នកភូមិផ្អើលថា មានមនុស្សលង់ទឹកស្លាប់ នៅស្រះទឹកខាងត្បូងផ្ទះខ្លួន បាននាំគ្នាចុះស្រង់ទ្បើងមកលើគោក ទើបដឹងថា អ្នកនោះគឺជាបងថ្លៃខ្លួន និងកូនជនរងគ្រោះ។
ក្រោយកើតហេតុ មន្ត្រីជំនាញ បានធ្វើកោសល្យវិច័យ ពុំឃើញមានស្លាកស្នាម អ្វីគួឲ្យកត់សម្គាល់ឡើង គឺសពពិតជាស្លាប់ដោយលង់ទឹកមែន៕
មតិយោបល់