បន្ទាយមានជ័យៈ រថយន្តខូចឈប់ចតគ្មានដាក់ភ្លើងបំភ្លឺ ត្រូវម៉ូតូបុកពីក្រោយរបួសធ្ងន់ម្នាក់ ហេតុការណ៍នេះបានកើតឡើងនៅព្រឹកថ្ងៃទី១០​ ខែតុលា​ ឆ្នាំ២០១៩ នៅចំណុចបរិវេណរោងចក្រទឹកកក ស្ថិតក្នុងសង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ។

លោកវរសេនីយ៍ទោ សួន នីប៉ូ នាយរងការិយាល័យ នគរបាលចរាចរណ៍ជើងគោកខេត្តបានឲ្យដឹងថា​៖​ ជនរងគ្រោះអ្នកបើកបរម៉ូតូឈ្មោះ ធាន ធៀង ភេទប្រុស​ អាយុ ៣៥ឆ្នាំ នៅភូមិចង្ហា ឃុំចង្ហា ស្រុកអូរជ្រៅ​ ខេត្តបន្ទាយមានជ័យ ម៉ូតូម៉ាកហុងដា​ សេ១០០ ស៊េរីចាស់ ពណ៌ក្រហម-ខ្មៅ។
អ្នកបើកបររថយន្តឈ្មោះ ហ៊ុំ វិបុល ភេទប្រុស​ អាយុ ២៤ឆ្នាំ ស្រុកកំណើតនៅភូមិតាគាំ ឃុំជាងទង ស្រុកត្រាំកក់ ខេត្តតាកែវ មកស្នាក់នៅភូមិសូភី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ប្រកបរបរបូមបង្គន់ រថយន្តច្នៃធុនធំ ពាក់ស្លាកលេខ តាកែវ 3A.3281 ។
លោកនាយរងការិយាល័យ បានបញ្ជាក់ថា​៖​ នៅមុនពេលកើតហេតុ ជនរងគ្រោះបានបើកម៉ូតូពីទិសខាងកើតទៅលិចមានពាក់មួកសុវត្ថិភាព ពេលដល់ចំណុចបរិវេណរោងចក្រទឹកកក ស្ថិតក្នុងសង្កាត់ទឹកថ្លា ក្រុងសិរីសោភ័ណ បានបុករថយន្តច្នៃដែលខូចគាំងចតដោយគ្មានសញ្ញាភ្លើងបំភ្លឺ ពីក្រោយបណ្តាលឲ្យអ្នកបើកបរម៉ូតូរងរបួសធ្ងន់ ត្រូវរថយន្តសង្រ្គោះរបស់ស្នងការដ្ឋានដឹកទៅសង្រ្គោះនៅមន្ទីរពេទ្យបង្អែកមិត្តភាពកម្ពុជា-ជប៉ុន នៅស្រុកមង្គលបូរី រីឯវត្ថុតាងរថយន្ត​ និងម៉ូតូកម្លាំងនគរបាលជំនាញ យកមករក្សាទុកនៅស្នងការដ្ឋាននគរបាលខេត្ត ដើម្បីដោះស្រាយគ្នានៅពេលក្រោយ៕