សៀមរាប: យោងតាមផេកយុវជនប្រតិកម្មរហ័សរដ្ឋ ក្រុងសៀមរាប បានឲ្យដឹងកាលពីថ្ងៃទី១៤ ខែធ្នូ ឆ្នាំ២០១៩ ថា បន្ទាប់ពីបានទទួលសេចក្តីរាយការណ៍ ពីបងប្អូនប្រជាកសិករ លោកនួន ពុទ្ធារ៉ា អភិបាលនៃគណ:អភិបាលក្រុងសៀមរាប បានចាត់ឲ្យ មន្ត្រីការិយាល័យកសិកម្មក្រុង និងអាជ្ញាធរសង្កាត់ជ្រាវ ចុះទៅពិនិត្យមើល ស្ថានភាព ដំណាំស្រូវបណ្ដេញទឹក របស់បងប្អូនប្រជាកសិករ នៅក្នុងភូមិបឹង ភូមិក្រសាំង ភូមិវាល និងភូមិជ្រាវ សង្កាត់ជ្រាវ ដែលរងការខ្វះខាតទឹកស្រោចស្រព ដែលអាច ធ្វើឲ្យស្រូវ របស់បងប្អូនប្រជាកសិករ ប្រឈមនិងបញ្ហា ស្វិតជាច្រើនហិកតា នៅថ្ងៃខាងមុខនេះ ។

ក្រោយចុះពិនិត្យ ក្រុមការងារ បានធ្វើការស្នើ តាមរយ:រដ្ឋបាលក្រុងសៀមរាប ទៅលោកប្រធានមន្ទីរធនធានទឹក និង លោកអគ្គនាយក អាជ្ញាធរជាតិអប្សរា ដែលគ្រប់គ្រងទឹក ក្នុង ដងស្ទឹងសៀមរាប ឲ្យជួយបើកទ្វារបង្ហូរទឹក ឲ្យបានខ្លាំង តាមប្រពន្ធ័ប្រឡាយទឹកដែលមានស្រាប់ ចូលទៅដីស្រែបងប្អូនប្រជាកសិករ ដើម្បីសង្គ្រោះស្រូវបណ្តេញទឹក ដែលកំពុងជួបបញ្ហាប្រឈម នេះផងដែរ ។

នៅក្នុងថ្ងៃដដែលនេះ ក្រោយទទួលបានការស្នើសុំពីបងប្អូនប្រជាកសិករ មន្ទីរធនធានទឹក និង អង្គភាពអាជ្ញាធរជាតិអប្សរា បានធ្វើការឆ្លើយតប ដោយបើកទ្វារ បញ្ជូនទឹក ទៅជួយសង្គ្រោះដំណាំស្រូវ របស់បងប្អូនប្រជាកសិករ ជាបណ្តើរៗហើយ៕