ភ្នំពេញៈ ទីតាំងអ៊ីនធើណេតភ្នាល់បាល់ស៊ីសងក្នុងមូលដ្ឋានខណ្ឌដូនពេញ មិនតិចជាង៤០កន្លែងនោះទេ ជាពិសេសនោះគឺអ៊ីនធើណេត២៤ យីហោ ផ្ទះខៀវ3333 ដែលស្ថិតនៅផ្លូវលេខ១៥៤ សង្កាត់ផ្សារកណ្ដាលទី២ ខណ្ឌដូនពេញ បើទោះជាការអនុវត្តគោលនយោបាយ ភូមិឃុំ មានសុវត្ថិភាព នៅតែជាការយកចិត្តទុកដាក់ ជំរុញពីអភិបាល នៃគណៈអភិបាលរាជធានីភ្នំពេញក៏ដោយ ប៉ុន្តែការបង្ក្រាបបទល្មើស បនល្បែងស៊ីសង ដើម្បីសុវត្ថិភាព សន្តិសុខ សណ្តាប់ធ្នាប់ជូនប្រជាពលរដ្ឋនៅក្នុងមូលដ្ឋានខណ្ឌដូនពេញ នៅមានកម្រិត ខណៈអាជ្ញាធរ សមត្ថកិច្ច គ្រប់ជាន់ថ្នាក់ មានភាពធូរលុង ដោយអនុញ្ញាតឲ្យទីតាំងបនល្បែងអ៊ីនធើណេត២៤ យីហោ ជាច្រើនកំពុងដំណើរការយ៉ាងអនាធិបតេយ្យ និង បង្កើតពីក្តីព្រួយបារម្ភលើសន្តិសុខ សុវត្ថិភាពពីប្រជាពលរដ្ឋយ៉ាងខ្លាំងផងដែរ។
ជាក់ស្តែងនៅក្នុងខណ្ឌដូនពេញ ពោរពេញទៅដោយកន្លែងភ្នាល់បាល់ និងកត់កន្ទុយលេខ ឆ្នោត ជាកន្លែងអ៊ីនធើណេតយីហោ ណេត២៤ម៉ោង ដែលមានអ្នកចូលលេងទាំងយប់ទាំងថ្ងៃ បើទោះបីជាលោក គួច ចំរើន អភិបាលនៃគណៈអភិបាលខណ្ឌដូនពេញ តែងតែចុះបង្រ្កាបទីតាំងហ្គេមបាញ់ត្រីស្ទើរតែអស់ក៏ដោយ ប៉ុន្តែអ្វីដែលប្រជាពលរដ្ឋព្រួយបារម្ភពីសុវត្តិភាពសន្តិសុខនោះ គឺទីតាំងអ៊ីនធើណេតយីហោ ណេត២៤ម៉ោង ដែលលាក់លួចភ្នាល់បាល់ទាំងអស់នោះនៅតែបើកលេងយ៉ាងអនាធិបតេយ្យ។
បើយោងតាមប្រភពពីអាជ្ញាធរ និងសមត្ថកិច្ចមួយចំនួនដែលមិនសប្បាយចិត្តចំពោះការបើកបនល្បែងស៊ីសងនេះ ក៏បានបង្ហើបថា យីហោ អ៊ីនធើណេត២៤ម៉ោងទាំងអស់នោះ មិនក្រោមជាង៥០កន្លែងនោះទេ ក្នុងខណ្ឌដូនពេញ ដូចជា តាមបណ្តោយផ្លូវលេខ៧០ ក្បែរស្តាតចាស់ សង្កាត់ស្រះចក ចំនួន៣ ; សង្កាត់ផ្សារថ្មីទី១ ផ្លូវលេខ១១៨ ចំនួន១កន្លែង;សង្កាត់ផ្សារចាស់ ចំនួន៣កន្លែង តាមផ្លូវលេខ១៩-១១៨ ;សង្កាត់ផ្សារថ្មីទី២ ចំនួន៥កន្លែង តាមផ្លូវកម្ពុជាក្រោម ;សង្កាត់ផ្សារថ្មីទី៣ ចំនួន៧កន្លែង ;សង្កាត់ផ្សារកណ្ដាលទី១ ចំនួន៤កន្លែង ;សង្កាត់បឹងរាំង ចំនួន១កន្លែង ;សង្កាត់ជ័យជំនះ ចំនួន២កន្លែង ;សង្កាត់ចតុមុខ ចំនួន២កន្លែង; សង្កាត់ផ្សារកណ្ដាលទី២ ចំនួន៤កន្លែង ហើយជាពិសេសនោះអ៊ីនធើណេត២៤ យីហោ ផ្ទះខៀវ3333 ដែលមានអ្នកឈរឈ្មោះណុប រស្មី ភេទស្រី ជាអ្នកចេញមុខរត់ការផងជាមួយនិងអាជ្ញាធរពីថ្នាក់លើដល់ថ្នាក់ក្រោមផងដែរ ដោយសារតែម្ចាស់ទីតាំងអាចនឹងមានភាពស្និទ្ធស្នាល ឬផ្តល់ប្រយោជន៍ណាមួយសម្រាប់អាជ្ញាធរ និងសមត្ថកិច្ច ទើបគេហ៊ានបើកល្បែងស៊ីសង ដោយមិនញញើតសមត្ថកិច្ចបែបនេះ។
លោក គួច ចំរើន អភិបាលនៃគណៈអភិបាលខណ្ឌដូនពេញ តែងតែលើកពីវិធានការបង្ក្រាប និងមិនអនុញ្ញាតឲ្យមានបនល្បែងស៊ីសង ពិសេស អនុវត្តគោលនយោបាយភូមិ សង្កាត់មានសុវត្ថិភាព ដើម្បីរក្សាបាននូវសន្តិសុខ សុវត្ថិភាពជូនប្រជាពលរដ្ឋ ប៉ុន្តែហេតុអ្វីក៏ទីតាំងបនល្បែងអ៊ីនធើណេត២៤ យីហោ ផ្ទះខៀវ3333 មានដ៏សម្បូរបែបនៅក្នុងខណ្ឌមួយនេះ ដ៏លើលលប់ម្ល៉េះ?។
គួរបញ្ជាក់ផងដែរថា កន្លងមក លោកគួច ចំរើន អភិបាលនៃគណៈអភិបាលខណ្ឌដូនពេញ ធ្លាប់បានឲ្យដឹងថានៅក្នុងពិធីវាយកំទ្ទេចទូរហ្គេមបាញ់ត្រីនិងហ្គេមបៀ ដែលលោកចុះបង្រ្កាបផ្ទាល់ស្ទើរតែអស់នោះ លោកតែងតែឲ្យមន្ត្រីចុះទៅពិនិត្យ ទីតាំងអ៊ីនធើណេតយីហោ២៤ទាំងអស់ ធ្វើច្បាប់ឲ្យបានត្រឹមត្រូវ ហើយទីតាំងទាំងនោះពិតជាលួចលាក់ភ្នាល់បាល់មែននោះ លោកនិងសុំគោលការណ៍ពីថ្នាក់លើចុះបង្រ្កាបទីតាំងហ្គេមអ៊ីនធើណេតទាំងនោះបន្តទៀត ដូចដែលលោកចុះបង្រ្កាបហ្គេមបាញ់ត្រីចឹង ហើយលោកបានប្តេជ្ញាថានឹងមិនឲ្យមានល្បែងស៊ីសងក្នុងមូលដ្ឋានខណ្ឌដូនពេញទៀតឡើយ ប៉ុន្តែជាលទ្ធផល ក្តីសង្ឃឹមរបស់ប្រជាពលរដ្ឋ និងវិធានការអនុវត្តគោលនយោបាយភូមិ សង្កាត់ មានសុវត្ថិភាព ហាក់ដូចខ្វះការទទួលខុសត្រូវ អាចដាក់ភាពសង្ស័យថា មានកត្តាយោគយល់ពីលោកអភិបាលខណ្ឌ។
ប្រជាពលរដ្ឋសំណូមពរឲ្យអាជ្ញារគួរមានវិធានការលុបបំបាត់ចំពោះបនល្បែងស៊ីសងទាំងនេះ ខណៈជាប្រភពនៃបទល្មើស លួចឆក់ប្លន់ កាប់សម្លាប់ ក្នុងនោះទីតាំងនៃអ៊ីនធើណេតផងដែរ គឺជាកន្លែងប្រើប្រាស់ជួញដូរគ្រឿងញៀន យ៉ាងសកម្មភាពនៅក្នុងទីតាំងទាំងនោះ បង្កឲ្យប៉ះពាល់ដល់សង្គមយ៉ាងធ្ងន់បំផុត និងចង់ឲ្យលោកអភិបាលបង្រ្កាបទីតាំងអ៊ីនធើណេតទាំងអស់នោះដូចលោកចុះបង្រ្កាបហ្គេមបាញ់ត្រីចឹងដែរ៕
មតិយោបល់