កណ្តាលៈ ជនរងគ្រោះម្នាក់បានស្លាប់ភ្លាមៗនៅហ្នឹងកន្លែងកើតហេតុ ដោយសារជិះម៉ូតូដួល និងខ្ទាតចូលក្រោមរថយន្តកុងតឺន័កិនស្លាប់យ៉ាងអាណោចអាធ័ម កាលពីវេលាម៉ោង១២៖០០នាទី ថ្ងៃទី២៧ ខែកក្កដា ឆ្នាំ២០១៦ នៅលើកំណាត់ផ្លូវជាតិលេខ១ ចន្លោះគីឡូម៉ែត្រលេខ២១និង២២ ក្នុងភូនិចិនកោះ ឃុំគគី ស្រុកកៀនស្វាយ ខេត្តកណ្តាល។
បើតាមសាក្សីបានឃើញការណ៍បានឲ្យដឹងថា ជនរងគ្រោះបើកបរម៉ូតូ១គ្រឿងម៉ាកសេ១២៥ ពណ៌ខ្មៅ ពាក់ស្លាកលេខភ្នំពេញ១FM.៥៥.១០ បានដឹកមាន់ពេញទ្រុង និងធ្វើដំណើរចេញពីអ្នកលឿងទិសដៅទៅភ្នំពេញ(បើកបរបញ្ចាសទិសគ្នា) លុះមកដល់ត្រង់ចំណុចខាងលើ ស្រាប់តែបានដួលម៉ូតូ បណ្តាលឲ្យជនរងគ្រោះខ្ទាតទៅលើថ្នល់ ស្រាប់តែរថយន្តកុងតឺន័របើកបរបញ្ចាសទិសគ្នាមកដល់កិនជនរងគ្រោះស្លាប់យ៉ាងរន្ធត់ រួចបន្ថែមល្បឿនគេចខ្លួនបាត់ស្រមោលតែម្តង។
លោក ហង់ ផាណារ៉ា នាយផ្នែកចរាចរណ៍ស្រុកបានប្រាប់ថា ជនរងគ្រោះមានឈ្មោះ ឆេង ជា ភេទប្រុស អាយុ២២ឆ្នាំ រស់នៅភូមិគ្រួស ឃុំកន្សោមអក ស្រុកកំពង់ត្របែក ខេត្តព្រៃវែង។ ចំណែកព្រភពពីឪពុកជនរងគ្រោះក៏បានឲ្យដឹងដែរថា កូនប្រុសរបស់គាត់ទើបរៀបការបាន៣ខែមកហើយ។
ក្រោយកើតហេតុសមត្ថកិច្ចជំនាញស្រុកបានចុះទៅធ្វើការវាស់វែង និងបានប្រគល់សាកសពជូនក្រុមគ្រួសារយកទៅធ្វើបុណ្យតាមប្រពៃណី៕
មតិយោបល់