មណ្ឌលគិរីៈ តៃកុងឡានដឹកកម្មករក្រុមហ៊ុនចំការកៅស៊ូ សុកហ្វីន ខេស៊ីឌី ម្នាក់រងរបួសជាទម្ងន់ ខណៈចុះត្រួតពិនិត្យមើលខាងក្រោមយានយន្តរបស់ខ្លួន ស្រាប់តែឡានរអិលថយក្រោយកិនលើក្បាល និងដងខ្លួនតែម្តង កាលពីវេលាម៉ោង៦:២០នាទី ព្រឹកថ្ងៃទី២៧ ខែកក្កដា ឆ្នាំ២០១៦ ស្ថិតនៅឃុំប៊ូស្រា ស្រុកពេជ្រាដា។
ប្រភពឲ្យដឹងថា ជនរងគ្រោះជាកម្មករឈ្មោះ គឹម សុផល អាយុ៦១ឆ្នាំ ជាអ្នកបើកឡានដឹកកម្មករ នៅក្នុងក្រុមហ៊ុនចំការកៅស៊ូ សុកហ្វីន ខេស៊ីឌី មានទីតាំងស្ថិតនៅឃុំប៊ូស្រា ស្រុកពេជ្រាដា ខណៈត្រលប់មកពីដាក់កម្មករចុះនៅចំការ ហើយឡានមានបញ្ហា ដល់ពាក់កណ្តាលផ្លូវក៏បានឈប់ឡាន ដើម្បីពិនិត្យមើលនៅខាងក្រោមឡាន ក៏ស្រាប់តែឡានរអិលកិនពីលើ បណ្តាលឲ្យរងរបួសធ្ងន់ធ្ងរ ត្រង់ក្បាល និងខ្លួនជាច្រើនកន្លែង។
បច្ចុប្បន្ន ជនរងគ្រោះកំពុងសម្រាកព្យាបាលនៅមន្ទីរពេទ្យបង្អែកខេត្តមណ្ឌលគិរី។ សូមបញ្ជាក់ថា រាល់ថៃ្លព្យាបាលរហូតដល់ជាសះស្បើយ ជាបន្ទុករបស់បេឡាសន្តិសុខសង្គម (បសស) ខេត្តមណ្ឌលគិរី។
ជាមួយគ្នានេះដែរ ប.ស.ស ក៏សូមអំពាវនាវដល់បុគ្គលិក កម្មករ-កម្មការិនី ឱ្យមានការប្រុងប្រយ័ត្នក្នុងការធ្វើដំណើរ ព្រោះគ្រោះថ្នាក់តែងតែកើតមានឡើង មិនប្រកាន់ពេលវេលា ឬទីកន្លែងឡើយ៕
មតិយោបល់